যোৰহাটত ক্ৰিকেটৰ বাবে ৰঙাঘৰৰ আলহী হ’ল ছগৰাকীকৈ যুৱক

ভদ্ৰতাৰ খেল হিচাপে ক্ৰিকেট পৰিচিত যদিও সোমবাৰে এই খেলবিধৰ বাবে যোৰহাটত ৰঙাঘৰৰ আলহী হ’বলগীয়া হয় ছগৰাকীকৈ যুৱক। আটকাধীন ছগৰাকী যুৱকৰ ভিতৰত চাৰিজন যোৰহাট অভিযান্ত্ৰিক মহাবিদ্যালয়ৰ ছাত্ৰ বুলি জানিব পৰা গৈছে।

আৰক্ষীৰ সূত্ৰৰ পৰা জানিব পৰা মতে যোৰহাট আৰক্ষী থানাৰ অন্তৰ্গত গড়মূৰ আৰক্ষী চকীত দুটা পক্ষই  পৃথকে পৃথকে দাখিল কৰা এজাহাৰৰ ভিত্তিতে আৰক্ষীয়ে উক্ত যুৱক কেইজনক আটক কৰে।

ইটোৱে সিটোক বেয়াকৈ শাৰিৰীক আক্ৰমণ চলোৱাৰ অভিযোগ উত্থাপন কৰি গড়মূৰৰ ৩০জন যুৱকে এখন আৰু যোৰহাট অভিযান্ত্ৰিক মহাবিদ্যালয়ৰ হোষ্টেলৰ কেইজন মান ছাত্ৰই আন এখন এজাহাৰ দাখিল কৰে।

এই এজাহাৰৰ ভিত্তিতে আটক হয় ছজনকৈ যুৱক। ইফালে আটকাধীন যুৱক কেইজনক পাছত আৰক্ষীয়ে জামিনত এৰি দিয়ে।

ঘটনা সন্দৰ্ভত জানিব পৰা মতে গড়মূৰৰ কেইজন মান যুৱকে দেওবাৰে ক্ৰিকেট খেলাৰ উদ্দেশ্যে যোৰহাট অভিযান্ত্ৰিক মহাবিদ্যালয়ৰ চৌহদত প্ৰৱেশ কৰিছিল। মহাবিদ্যালয়ৰ চৌহদত অন্য লোকক ক্ৰিকেট খেলিবলৈ দিয়া নহ’ব বুলি মহাবিদ্যালয়খনৰে কেইজন মান ছাত্ৰই বাধা আৰোপ কৰাৰ পাছতে দুয়োটা পক্ষৰ মাজত এক উত্তেজনাময় পৰিৱেশৰ সৃষ্টি হয়।

পৰিস্থিতি ইমানেই ভয়াবহলৈ গতি কৰে যে অৱশেষত দুয়োটা পক্ষই মাৰ পিটতো লিপ্ত হয়। এই আক্ৰমণত দুজনকৈ যুৱক গুৰুতৰভাৱে আঘাতপ্ৰাপ্ত হয়।

ইফালে দুয়োটা পক্ষৰ এজাহাৰৰ ভিত্তিত যোৰহাট আৰক্ষী থানাত ৪২/২০১৯ আৰু ৪৪/২০১৯ নম্বৰৰ দুটা গোচৰ ৰুজু হৈছে।