ওদালগুৰিৰ দলগাঁৱৰ ছিবৰীত মাৰুতী এল্টোৰ পৰা বৃহৎ পৰিমাণৰ নকল নোট জব্দ

ওদালগুৰিত সক্ৰিয় হৈ আছে এটা কুখ্যাৎ নকল নোটৰ চক্ৰ। এই চক্ৰটোৱে নকল ভাৰতীয় টকাৰ প্ৰচলনত জড়িত হৈ দৰং আৰু ওদালগুৰিত নিজৰ ক’লা ব্যৱসায় চলাই আহিছে।

দৰং আৰক্ষীৰ এটা দলে অলপতে বিৰাট পৰিমাণৰ নকল নোট উদ্ধাৰ কৰাৰ পাছত এই কথা স্পষ্ট হৈ পৰিছে। দৰঙৰ আৰক্ষী অধীক্ষক শ্ৰীনাথ থিৰাভিয়ামৰ মতে এটা গোপন সূত্ৰৰ পম খেদি আৰক্ষীৰ দলটোৱে আজি AS 13 E 6188 নম্বৰত পঞ্জীয়নভুক্ত এখন ৰঙা বৰণৰ মাৰুতী এল্টো গাড়ী আগচি ধৰে। দলগাঁও আৰক্ষী থানাৰ অন্তৰ্গত ছিবৰীত আগচি ধৰা বাহনখনৰ পৰা আৰক্ষীৰ দলটোৱে ২০০০ টকীয়া ভাৰতীয় নোটৰ দম উদ্ধাৰ কৰে। এই টকাখিনিৰ মূল্য হৈছে ৬,৪২,০০০.০০ টকা।

বাহনখনৰ চালকজনক আৰক্ষীয়ে গ্ৰেপ্তাৰ কৰিছে। অভিযুক্ত চালকজন হৈছে ওদালগুৰি আৰক্ষী থানাৰ অন্তৰ্গত জংগালগাঁও নিৱাসী কাছেম আলীৰ পুত্ৰ আছমত আলী।  অধিক তথ্য জনাৰ বাবে অভিযুক্ত আলীক বৰ্তমান আৰক্ষীয়ে জেৰা অব্যাহত ৰাখিছে।