মৃত খনি শ্ৰমিকৰ অৱশেষ বিচাৰি আত্মীয়ৰ হাহাকাৰ

মেঘালয়ৰ পূব জয়ন্তীয়া পাহাৰৰ এটা অবৈধ কয়লাখনিত ২০১৮ৰ ১৩ ডিচেম্বৰৰ পৰা আবদ্ধ হৈ থকা ১৫গৰাকী খনি শ্ৰমিকক জীয়ন্তে উদ্ধাৰ কৰা আশা বৰ্তমান নিৰ্বাপিত হৈছে। নৌ বাহিনীৰ উদ্ধাৰকাৰী দলটোৱে বৃহস্পতিবাৰে ১৬০ ফুট গভীৰতাত এটা মৃতদেহ প্ৰত্যক্ষ কৰাৰ পাছত তেওঁলোক যে আৰু জীৱিত নাই সেয়া প্ৰায় নিশ্চিত হৈ পৰিছে।

আনহাতে শ্ৰমিকসকলৰ পৰিয়ালে তথাপিও বিচাৰিছে যে তেওঁলোকৰ আপোনজনৰ দেহৰ অৱশিষ্ট যিয়েই বাকী নাথাকক কিয়, সেয়া যেন তেওঁলোকক অৰ্পণ কৰা হয়।

মৃতদেহটো প্ৰত্যক্ষ কৰাৰ পাছত উদ্ধাৰকাৰী দলে গেলি যোৱা মৃতদেহটো উদ্ধাৰ কৰিব নে নাই তাক নিৰ্ণয় কৰিব পৰা নাই। উদ্ধাৰকাৰী দলৰ আনুষ্ঠানিক মুখপাত্ৰ আৰ ছুছনগিয়ে ৫টা শ্ৰমিকৰ লোকক সাক্ষাৎ কৰি জনাইছে, ‘‘যদিহে মৃতদেহ অনাৰ চেষ্টা কৰা হয়, তেতিয়া সেয়া চিঙি যোৱাৰ সম্ভাৱনা আছে।’’

কিন্তু শ্ৰমিকসকলৰ এগৰাকী আত্মীয়ই কৈছে, আমাক আমাৰ আপোনজনৰ আঙুলি এটা হ’লেও লাগে। সেই আঙুলিটোৰে চিকিৎসকলে সেয়া কোন ব্যক্তি আছিল তাক নিৰ্ণয় কৰিব পাৰিব। কিন্তু দেখা গৈছে যে উদ্ধাৰকাৰী বিষয়াসকলে মৃতদেহ চিঙু যোৱাৰ বিষয়তহে অধিক মনোযোগ দিছে।

আনহাতে মেঘালয়ৰ মুখ্য মন্ত্ৰী কনৰাড ছাংমাই বৃহস্পতিবাৰে কৈছে যে দুয়া কাৰণতেই মৃতদেহ অনাটো সম্ভৱপৰ নহয়। প্ৰথম কাৰণটো হৈছে দূৰ নিয়ন্ত্ৰিত যানেৰে (Remotely Operated Vehicle চমুকৈ ROV) ) মৃতদেহকেইটাৰ উপস্থিতি ধৰা পেলাব পৰা গৈছে যদিও সেই সমূহৰ ওজন ইমান অধিক যে যানখনে সেয়া বহন কৰিব নোৱাৰে। আনহাতে জলস্তৰৰ আধিক্যৰ বাবে তালৈ উদ্ধাৰকাৰী দলৰ ডুবাৰুও সোমাই যোৱাটো অসম্ভৱ। আনহাতে পচন ধৰাৰ ফলত মৃতদেহসমূহ কোমল হৈ পৰিছে। প্ৰতিবাৰ চেষ্টা কৰাৰ পাছত মৃতদেহৰ অংশ চিঙি আহে।

উদ্ধাৰকাৰী দলৰ মুখপাত্ৰগৰাকীয়ে আৰু জনাইছে যে সমগ্ৰ শুকুৰবাৰৰ দিনটো ধৰি উদ্ধাৰ অভিযান চলি আছিল।