টংলাত অবৈধভাৱে শিল-বালি কঢ়িওৱা ৩খন ডাম্পাৰ জব্দ

ওদালগুৰি জিলাৰ টংলা নগৰত ২১ জানুৱাৰিত ধনশিৰি বন সংমণ্ডলৰ বিষয়া আৰু টংলা আৰক্ষীয়ে চলোৱা এক যুটীয়া অভিযানত অবৈধভাৱে শিল-বালি কঢ়িয়াই অনা তিনিখনকৈ ডাম্পাৰ জব্দ কৰে। শিল-বালিখিনি ভাৰত-ভুটান সীমান্তৱৰ্তী নদীৰ পৰা আনিছিল বুলি জানিব পৰা গৈছে।

জব্দ হোৱা ডাম্পাৰকেইখনৰ নম্বৰ ক্ৰমে এ এছ ১৩ চি-৫৫৪২, এ এছ ০১ এফ চি-৮৯৭৩, এ এছ ১৩ চি-৫৩৪২ আৰু এইকেইখন প্ৰভু আগৰৱালা কনষ্ট্ৰাকশ্যন প্ৰাইভেট লিমিটেডৰ বুলি আৰক্ষীয়ে জানিবলৈ দিয়ে।

উল্লেখযোগ্য যে, এই অভিযানৰ সময়ত শিল-বালিৰ অবৈধ সৰবৰাহ কৰা ডাম্পাৰ জব্দ হোৱাটোৱে ৰাজ্যখনত অবৈধ শিল-বালিৰ বৃহৎ ছিণ্ডিকেট চলি থকাৰ ইংগিত দিয়ে। স্থানীয় লোকে অভিযোগ কৰা মতে, এই ছিণ্ডিকেটটো ৰাজ্যৰ বিভিন্ন প্ৰান্তলৈ  শিল-বালি যোগান ধৰা গুৱাহাটী, মঙলদৈ আৰু টংলাৰ এচাম ঠিকাদাৰ, ব্যৱসায়ীয়ে নিয়ন্ত্ৰণ কৰে বুলি তথ্য পোৱা গৈছে.

এটা সমৰ্থিত সূত্ৰই কয় যে শিল-বালিৰ ছিণ্ডিকেট চলোৱা এইসকল ব্যৱসায়ীৰ সৈতে প্ৰভাৱশালী ৰাজনৈতিক নেতাৰ সুসম্পৰ্ক থকা বাবে এওঁলোকে বন বিভাগ আৰু আৰক্ষী বিভাগৰ শীৰ্ষ বিষয়াক মেনেজ কৰি অবৈধভাৱে এই ব্যৱসায় চলাই আহিছে। আনহাতে যোৱা দিনবোৰত ডাম্পাৰসমূহত অবৈধভাৱে বহু পৰিমাণৰ শিল-বালি কঢ়িওৱাৰ ফলত টংলা অঞ্চলত ভালেকেইটা দুৰ্ঘটনাও সংঘটিত হৈছে।