বড়ো জাতিৰ পৰিচয়েই হৈছে তেওঁলোকৰ সমৃদ্ধ সংস্কৃতি আৰু আধ্যাত্মিকতা : সোণোৱাল

ওদালগুৰি জিলাৰ মাজবাটত অনুষ্ঠিত হোৱা সদৌ বাথৌ মহাসভাৰ বাৰ্ষিক সন্মিলন আৰু ওদালগুৰি জিলা বাথৌ মহাসভাৰ ৰূপালী জয়ন্তী অনুষ্ঠানত মুখ্য মন্ত্ৰী সৰ্বানন্দ সোণোৱাল উপস্থিত থাকি কয় যে বড়ো জাতিৰ মানুহৰ পৰিচয়েই হৈছে তেওঁলোকৰ সমৃদ্ধ সামাজিক-সংস্কৃতি আৰু আধ্যাত্মিক অনুশীলন।

মুখ্যমন্ত্ৰীগৰাকীয়ে লগতে কয় যে এখন সমাজ আগ বাঢ়িবলৈ হ’লে এটা সুন্দৰ পৰিৱেশৰ প্ৰয়োজন । কিছুমান অশুভ শক্তিয়ে সমাজখনক ধংস কৰিবৰ বাবে চেষ্টা কৰি থাকে। সেইসকলৰ পৰা ছাত্ৰ-ছাত্ৰীসকলক আঁতৰাই ৰাখি সুন্দৰ ভবিষ্যতৰ দিশে আগ বঢ়াই লৈ যাব লাগে।

তেওঁ কয় যে জাতি-মাটি-ভেটি ৰক্ষাৰ উদ্দেশ্য আগত ৰাখি তেওঁলোকে ক্ষমতাৰ বাঘজৰী লাভ কৰিছে আৰু সদায় খিলঞ্জীয়াৰ পক্ষে কাম কৰি যাব।

সদৌ অসম ছাত্ৰ সন্থাৰ লগতে বুদ্ধিজীবীসকলক খিলঞ্জীয়াসকলৰ ৰক্ষাকৱচ অসম চুক্তিৰ ৬নং দফা ৰূপায়ণত সহযোগ কৰিবলৈ আহ্বান জনায় মুখ্য মন্ত্ৰী সোণোৱালে।

অনুষ্ঠানত অসম চৰকাৰৰ জনস্বাস্থ্য আৰু কাৰিকৰী মন্ত্ৰী ৰিহন দৈমাৰী, পৰ্যটন মন্ত্ৰী চন্দন ব্ৰহ্ম, সাংসদ ৰমেন ডেকা, বিধায়ক চৰন বড়োৱেও ভাষণ প্ৰদান কৰে। লগতে সাংসদ বিশ্বজিৎ দৈমাৰী, বিধায়ক ক্ৰমে বিনন্দ শইকীয়া, থানেশ্বৰ বসুমতাৰী, কমলী বসুমতাৰী, মহেশ্ৱৰী বড়ো, সদৌ বাথৌ মহাসভাৰ বাৰ্ষিক সন্মিলনৰ সভাপতি মন্টু বসুমতাৰীৰ লগতে ভালেসংখ্যক গণ্য-মান্য ব্যক্তি উপস্থিত থাকে।