বিধেয়কৰ বিৰুদ্ধে জোঁৰ লৈ ৰাজপথত ভোজপুৰী সমাজ

অসম তথা উত্তৰ-পূবৰ খিলঞ্জীয়াই ব্যাপক বিৰোধিতা কৰা নাগৰিকত্ব বিধেয়কৰ বিৰুদ্ধে বুধবাৰে সন্ধিয়া বোকাখাতৰ ৰাজপথত হাতত জোঁৰ লৈ ওলাই আহিল ভোজপুৰী সমাজ।

“সৰ্বানন্দ সোণোৱালৰ কাম নাই, বিজেপি হায় হায়” আদি ধ্বনিৰে বোকাখাতৰ পুৱতি সাহিত্য সভা ভৱনৰ সমীপৰ পৰা সদৌ অসম ভোজপুৰী পৰিষদৰ নেতৃত্বত ওলোৱা প্ৰতিবাদী সমদলটোৱে উত্তাল কৰি তোলে বোকাখাত নগৰ।

মূলতঃ শ্ৰমজীৱী ভোজপুৰী লোকসকলে “বহু কষ্টৰে” প্ৰতিবাদলৈ ওলোৱা বুলি মন্তব্য কৰি সমাজে বিতৰ্কিত বিধেয়কখন বাতিল কৰিবৰ বাবে বিজেপি চৰকাৰক দাবী জনায়।

বিধেয়কখনৰ বিৰুদ্ধে অসমৰ খিলঞ্জীয়াৰ ধাৰাৱাহিক প্ৰতিবাদৰ বিপৰীতে শেহতীয়াকৈ ৰাজ্যৰ ভোজপুৰী, বাঙালী, মাৰোৱাৰী আদি সম্প্ৰদায়ো ওলাই অহাটো গেৰুৱা দলটোৰ কাৰণে ৰাজনৈতিকভাৱে তাৎপৰ্য্যপূৰ্ণ হৈ উঠিব পাৰে।

মঙলবাৰেও বিধেয়কৰ বিৰোধিতাৰে বোকাখাতত মাৰোৱাৰী সমাজ ওলাই আহিছিল। মাৰোৱাৰী যুৱ মঞ্চৰ উদ্যোগত সমাজেও বিধেয়ক বাতিলৰ দাবীত বোকাখাতৰ মহকুমাধিপতিৰ জড়িয়তে ভাৰতৰ ৰাষ্ট্ৰপতিলৈ স্মাৰক পত্ৰ প্ৰেৰণ কৰিছিল৷