কোকৰাঝাৰত নেতাজী সুভাষচন্দ্ৰ বসুৰ ১২৩ সংখ্যক জন্ম জয়ন্তী পালন

আজি সমগ্ৰ দেশতে নেতাজী সুভাষচন্দ্ৰ বসুৰ ১২৩ সংখ্যক জন্ম দিৱস পালন কৰাৰ দৰেই কোকৰাঝাৰ চহৰৰ আৱৰ্ত ভৱনৰ প্ৰাংগণতো দিনজোৰা কাৰ্যসূচীৰে উদযাপন কৰা হয় নেতাজীৰ জন্ম জয়ন্তী।

সদৌ অসম বাঙালী যুৱ ছাত্র ফেডাৰেশ্যনে কোকৰাঝাৰ জিলা সমিতিৰ উদ্যোগত অনুষ্ঠিত কৰা এই কাৰ্যসূচী ৰাষ্ট্ৰীয় পতাকা উত্তোলন আৰু চহিদ তৰ্পনেৰে আৰম্ভ হয়। পতাকা উত্তোলন কৰে সদৌ অসম বাঙালী যুৱ ছাত্র ফেডাৰেশ্যনৰ উপ সভাপতি বিশাল ঘোষ আৰু চহিদ বেদীত পুষ্পাঞ্জলীৰে শ্ৰদ্ধা নিবেদন জনাই সংগঠনৰ সহকাৰী সম্পাদক গৌৰাংগ দত্তই।

নেতাজীৰ জন্ম জয়ন্তী উপলক্ষে বড়ো, বাঙালী, গাৰো, ৰাভা, আদিবাসী আদি বিভিন্ন জনগোষ্ঠীৰ  লোকক লৈ এটা সাংস্কৃতিক শোভাযাত্ৰাও উলিওৱা হয়। তদুপৰি দুখীয়া লোকসকলৰ মাজত বিভিন্ন প্ৰয়োজনীয় সামগ্ৰীও বিতৰণ কৰা হয়।

কাৰ্যসূচীত উপস্থিত থাকি  সদৌ অসম বাঙালী ফেডাৰেশ্যনৰ জ’নেল কমিটিৰ সভাপতি ৰাজীৱ সৰকাৰে নাগৰিকত্ব সংশোধনী বিধেয়ক সন্দৰ্ভত সংবাদ মাধ্যমৰ আগত নিজৰ মত প্ৰকাশ কৰি কয় যে এই বিলখনকলৈ সংগঠনটোৰ একো ক’ব লগীয়া নাই, কিন্তু এন আৰ চিত বাদ পৰি যোৱা ৪০ লাখ  নাগৰিকৰ প্ৰসংগতো পুনৰ বিবেচনা কৰি সেইসকলক নাগৰিকত্ব প্ৰদান কৰাৰ প্ৰক্ৰিয়া ল’ব লাগে।

আনহাতে সদৌ বি টি চি বাঙালী যুৱ ছাত্র ফেডাৰেশ্যন (বাপ্পা গোট)য়ো গৌৰাং নৈৰ পাৰত নেতাজী সুভাষচন্দ্ৰ বসুৰ ১২৩ সংখ্যক জন্ম জয়ন্তী উদযাপনৰ উপলক্ষে ৰক্ত দান শিবিৰ আৰু সহস্ৰাধিক দুখীয়া লোকৰ মাজত কম্বল বিতৰণ কৰি সমাজ কল্যাণমূলক কাৰ্যসূচী ৰুপায়ন কৰে।

ইফালে ৰক্ত দান কৰি নিজকে মহৎ কাম কৰা বুলি সদৰী কৰে সদৌ বি টি চি বাঙালী যুৱ ছাত্র ফেডাৰেশ্যন কোকৰাঝাৰ জিলা সমিতিৰ সাধাৰণ সম্পাদক অমৰ সৰকাৰে।