বিদেশী মুক্ত অসম গঢ়াৰ বাবে প্ৰয়োজনীয় ব্যৱস্থা গ্ৰহণ কৰা হ’ব : ৰাজ্যপাল জগদীশ মুখী

‘’বিদেশী মুক্ত অসম গঢ়াৰ বাবে প্ৰয়োজনীয় ব্যৱস্থা গ্ৰহণ কৰা হ’ব। অবৈধ অনুপ্ৰবেশৰ সমস্যাৰ স্থায়ী সমাধানৰ বাবে কেন্দ্ৰীয় আৰু ৰাজ্য চৰকাৰে দৃঢ়তাৰে কাম কৰিছে।‘’ আজি খানাপাৰাত ৭০’ তম গণৰাজ্য দিৱসৰ কেন্দ্ৰীয়ভাৱে আয়োজিত অনুষ্ঠানত পতাকা উত্তোলন কৰি দিয়া ভাষণ প্ৰসংগত এইদৰে কয় ৰাজ্যপাল অধ্যাপক জগদীশ মুখীয়ে।

“এনআৰচিৰ বাবে আমি প্ৰতিশ্ৰুতিবদ্ধ। উচ্চতম ন্যায়ালয়ৰ নিৰ্দেশত এক সঠিক আৰু প্ৰামাণিক খচৰা তৈয়াৰ কৰা হৈছে, য’ত ৰাজ্যৰ সম্পূৰ্ণ প্ৰশাসন ব্যৱস্থাই নিজৰ সম্পূৰ্ণ সামৰ্থ্য আৰু নিষ্ঠাৰে কাম কৰিছে,”-এইদৰে কয় ৰাজ্যপাল মুখীয়ে।

আনহাতে, অসম চুক্তিৰ ৬ নং দফা এই চুক্তিৰ আত্মা বুলিও ৰাজ্যপাল গৰাকীয়ে সদৰী কৰি তেওঁ লগতে কয়,” অসমৰ খিলঞ্জীয়া লোকসকলৰ ৰাজনৈতিক অধিকাৰসমূহ যিকোনো উপায়ে সুৰক্ষিত কৰা হ’ব।”

ভাষণ প্ৰসংগতে ৰাজ্যপালে উত্থাপন কৰে ৬ জনগোষ্ঠীক জনজাতিকৰণৰ প্ৰসংগও। তেওঁ কয় “ছয় জনগোষ্ঠীক অনুসুচিত জনজাতিৰ মৰ্য্যদা দিয়া হ’ব। এই সিদ্ধান্ত গ্ৰহণ কৰোতে আমি এই বিষয়ৰ প্ৰতি সচেতন যাতে বৰ্তমানৰ অনুসূচিত জনজাতিসমূহৰ ওপৰত কোনোধৰণৰ চাপ আৰু বিৰূপ প্ৰভাব নপৰে।”

তদুপৰি, দীনদয়াল গ্ৰামীন কৌশল যোজনাৰ অধীনত গ্ৰামাঞ্চলত ৩৩,২২৯ গৰাকী যুৱক-যুৱতীক দক্ষতা বিকাশৰ প্ৰশিক্ষণ দিয়া হৈছে বুলি ভাষণৰ মাজতে উল্লেখ কৰে ৰাজ্যপালগৰাকীয়ে।

তেওঁ লগতে মহিলাসকলৰ বিকাশৰ বাবে ‘কনকলতা মহিলা সবলীকৰণ যোজনাৰ অধীনত ১.১৩ লাখ আত্ম সহায়ক গোটক আৰ্থিক সাহায্য প্ৰদান কৰি মহিলাসকলক স্বাৱলম্বী কৰি তোলাৰ কাম চলি আছে বুলিও কয়।

ৰাজ্যপালগৰাকীয়ে ভাষণত উল্লেখ কৰে যে বিদ্যালয়ৰ আন্তঃগাঁথনি উন্নয়নৰ বাবদ ২০১৮-১৯’ বৰ্ষত বাজেটত ধাৰ্য কৰা হৈছে ৯৮০ কোটি টকা। উচ্চ শিক্ষাৰ ক্ষেত্ৰতো বৃত্তিমূলক শিক্ষানুষ্ঠান আৰু বিশ্ববিদ্যালয়সমূহৰ বিকাশৰ বাবে ৬৬৭ কোটি টকা আৱন্টন কৰা হৈছে।

তদুপৰি, ২৮ খন জিলা, ২০৪ টা ব্লক, ২৪১১ খন গাওঁ পঞ্চায়ত, ২২,৪১৮ খন গাওঁ মুকলি স্থানত মলত্যাগ মুক্ত ঘোষিত কৰা হৈছে। চলিত বৰ্ষৰ ২ অক্টোবৰৰ ভিতৰত মুকলি স্থানত মলত্যাগ মুক্ত হৈ যাব বুলিও দাবী কৰে ৰাজ্যপালে।

আজিৰ শুভ দিনত স্বাধীনতা যুঁজাৰুসকলক স্মৰণ কৰাৰ লগতে ৰাজ্যপালে ৰূপকোঁৱৰ জ্যোতিপ্ৰসাদ আগৰৱালাৰ “ময়ে ভাৰতৰ নবীন সূৰ্য্য” শীৰ্ষক কবিতাৰ পংক্তিৰে ভাষণ সামৰে।

ৰাজ্যপালৰ ভাষণৰ পাছতে আৰক্ষী বাহিনীৰ কুছকাৱাজ প্ৰদৰ্শন আৰু বিভিন্ন জাতি-জনগোষ্ঠীৰ নৃত্য পৰিবেশিত হয়। কেন্দ্ৰীয়ভাৱে অনুষ্ঠিত এই গণৰাজ্য দিৱসত মুখ্য মন্ত্ৰী সৰ্বানন্দ সোণোৱালকে ধৰি বহু বিশিষ্ট ব্যক্তি উপস্থিত থাকে।