মোদীৰ সভালৈ আহক : এদিনৰ বাবে বিজেপিৰ বিনামূলীয়া তেল

প্ৰধান মন্ত্ৰী নৰেন্দ্ৰ মোদীয়ে আজি চাংসাৰিত প্ৰস্তাৱিত এইমছৰ ভূমি পূজন কাৰ্য্যসূচীত অংশগ্ৰহণ কৰিব। ৰাজ্যৰ বিভিন্ন দল সংগঠনে প্ৰধান মন্ত্ৰীৰ ভ্ৰমণৰ সময়ত ক’লা পতাকা দেখুৱাই নাগৰিকত্ব সংশোধনী বিধেয়ক বাতিল কৰাৰ দাবীৰে প্ৰতিবাদ সাব্যস্ত কৰিছে।

ৰাজ্যজুৰি চলি থকা প্ৰতিবাদী কাৰ্য্যসূচীৰ সমান্তৰালভাৱে ৰাজ্যিক বিজেপি ব্যস্ত মোদীৰ সভলৈ মানুহ গোটোৱাত। পন্থা যিয়েই নহওক কিয় মোদীৰ সভাত মানুহ হ’ব লাগিব। ৰেইলসেৱা, বাছসেৱা ব্যৱহাৰ কৰি সভালৈ মানুহ গোটাইছে বিজেপিয়ে। আশা কৰ্মী সকলক মোদীৰ সভাত উপস্থিত থকাটো বাধ্যতামূলক কৰা হৈছে।

আনহাতে, বিভিন্ন ঠাইত বিজেপি কৰ্মী সকলে বিতৰণ কৰিছে কূপন, যি কূপন ব্যৱহাৰ কৰি পেট্ৰ’ল পাম্পত নিজৰ বাহনত ভৰাব পাৰি সভালৈ অহাৰ বাবে তেল। সভাৰ শেষত কূপন ঘূৰাই দিলে লাভ কৰিব প্ৰতিটো কূপনৰ বিনিময়ত নগদ ধন। সভাত অংশগ্ৰহণকাৰী এজন লোকৰ ভাষ্য অনুসৰি প্ৰতিটো কূপনৰ বিনিময়ত তেওঁলোকে ৫০০ টকাকৈ লাভ কৰিব।

মোদীৰ সভাত যিয়েই নহওঁক, এদিনৰ বাবে হ’লেও বিনামূলীয়া তেল আৰু কূপনৰ বিনিময়ত ধন লাভ কৰি স্বাভাৱিকতে উৎফুল্লিত হৈছে অসমৰ একাংশ নিৱনুৱা যুৱক।