কাশ্মীৰৰ ৬০ লাখ মুছলমানে দেশৰ বিশ কোটি মুছলমানৰ মুখ ক’লা কৰিছে :  আব্দুল হামিদ

‘কাশ্মীৰত সন্ত্ৰাসবাদীসকলৰ প্ৰতি সহমৰ্মিতা দেখুওৱা আৰু সন্ত্ৰাসবাদী কাৰ্য্যকলাপত উদগনি যোগোৱা ষাঠী লাখ কাশ্মীৰী মুছলমানে ভাৰতৰ বিভিন্ন প্ৰান্তত বাস কৰা দুই কোটি মুছলমানৰ মুখ ক’লা কৰিছে।’ জম্মু কাশ্মীৰৰ ঘটনাক কঠোৰ ভাষাৰে গৰিহণা দি শুকুৰবাৰে সাংবাদিকৰ আগত এই মন্তব্য কৰে ধুবুৰী লোকসভা সমষ্টিৰ প্ৰাক্তন সাংসদ আব্দুল হামিদে।

প্ৰাক্তন সাংসদ গৰাকীয়ে কোনো জাতি বা ধৰ্মক সন্ত্ৰাসবাদে কেতিয়াও লাভৱাম্বিত কৰা নাই বৰঞ্চ সন্ত্ৰাসবাদৰ পক্ষ লোৱা সকল ক্ষতিগ্ৰস্ত হৈছে বুলি মন্তব্য কৰি কয় যে পুলৱামাত সন্ত্ৰাসবাদীয়ে দেশৰ সেনাবাহিনীক নহয় দেশৰা একতাত আক্ৰমণ কৰিছে।

কাশ্মীৰৰ সাধাৰণ জনতাক ব্যাৱহাৰ কৰি সন্ত্ৰাসবাদী কাৰ্য্যকলাপ সংঘটিত কৰি অহা উগ্ৰপন্থী দল সমূহক প্ৰাক্তন সাংসদ গৰাকীয়ে তীব্ৰ ভাষাৰে কটাক্ষ কৰে।

আনহাতে শুকুৰবাৰে গোৱালপাৰা জিলা আমছুৰ কৰ্মকৰ্তাসকলে চহৰখনৰ পৰিবহণ আস্থানত ম’মবাতি জ্বলাই পুলৱামাৰ বীৰ চহিদ সকললৈ শ্ৰদ্ধাঞ্জলি জ্ঞাপন কৰে।

উল্লেখযোগ্য যে পুলৱামাত চি আৰ পি এফৰ জোৱানৰ কনভয়ৰ ওপৰত সন্ত্ৰাসবাদী সংগঠন জে’শ্ব ই মহম্মদে কৰা আত্মঘাটী আক্ৰমণৰ ঘটনাৰ বিৰুদ্ধে দেশজুৰি বিভিন্ন দল-সংগঠনে প্ৰতিবাদ সাব্যস্ত কৰিছে। সকলো জাতি, ধৰ্মৰ লোকে এই ঘটনাক নিন্দা কৰি কঠোৰ হাতেৰে সন্ত্ৰাসবাদ দমনৰ বাবে চৰকাৰক দাবী জনাইছে।