বিজেপি চৰকাৰৰ উন্নয়নৰ সূচাংক : এবছৰত বৃদ্ধি পালে ৪ লাখ নিবনুৱা

অসমত বিজেপি নেতৃত্বাধীন চৰকাৰখনে বিভিন্ন দিশত উন্নয়ন তৰান্বিত কৰি তোলাৰ দাবী কৰি আহিলেও বাস্তৱত ৰাজ্যখনত নিবনুৱা সমস্যাই এক ভয়াবহ ভৱিষ্যতৰ ইংগিত দাঙি ধৰিছে। সোণোৱাল নেতৃত্বাধীন চৰকাৰখনৰ কাৰ্যকালৰ শেহতীয়া এটা বছৰতে অসমত ৪ লাখৰো অধিক নিবনুৱাৰ সংখ্যা বৃদ্ধি পাইছে।

বৃহস্পতিবাৰে বিধানসভাত চৰকাৰে দাখিল কৰা তথ্যৰ পৰাই এই কথা স্পষ্ট হৈছে। কংগ্ৰেছৰ বিধায়ক তথা বিৰোধী দলপতি দেৱব্ৰত শইকীয়াৰ নিবনুৱাৰ সংখ্যা সম্পৰ্কীয় এটা প্ৰশ্নৰ উত্তৰ দি মন্ত্ৰী পাটোৱাৰীয়ে কয় যে অসমৰ বিভিন্ন নিয়োগ বিনিময় কেন্দ্ৰত ২০১৮ চনৰ ছেপ্টেম্বৰ মাহলৈকে পঞ্জীয়নভুক্ত নিবনুৱাৰ সংখ্যা হৈছে ২০,৩৬,১১৮ গৰাকী।

উল্লেখযোগ্য যে ২০১৮ চনৰ ফেব্ৰুৱাৰি মাহত কেইবাজনো বিধায়কৰ প্ৰশ্নৰ উত্তৰত নিবনুৱাৰ সংখ্যা সম্পৰ্কীয় তথ্য সদৰি কৰি ৰাজ্য চৰকাৰে অসমত ১৬ লাখ নিবনুৱা থকা বুলি কৈছিল।

কিন্তু বৃহস্পতিবাৰে সদনত মন্ত্ৰী চন্দ্ৰমোহন পাটোৱাৰীয়ে দিয়া তথ্য মতে ৰাজ্যত এই এবছৰৰ ভিতৰতে চাৰি লাখতকৈয়ো অধিক নিবনুৱাৰ সংখ্যা বৃদ্ধি পালে।

বিজেপি নেতৃত্বাধীন ৰাজ্য চৰকাৰখনে অসমৰ জলন্ত সমস্যা নিবনুৱা সমস্যাৰ প্ৰতি যে বিশেষ গুৰুত্ব দিয়া নাই সেই কথা স্পষ্ট হৈ পৰিছে। আনহাতে, চৰকাৰখনে খিলঞ্জীয়া জনসাধাৰণৰ আৱেগ অনুভুতিক লৈ ৰাজনীতিতহে ব্যস্ত হৈ পৰা দেখা গৈছে।