আৰএছএছ-বিজেপিয়ে উত্তৰ-পূবৰ সংস্কৃতি, ঐতিহ্য, জীৱন-প্ৰণালীৰ ওপৰত আক্ৰমণ কৰিছে : ৰাহুল গান্ধী

আজি গুৱাৱাহাটীত এটা বিশাল সমাৱেশৰ আগত ভাষণ দি কংগ্ৰেছৰ ৰাষ্ট্ৰীয় সভাপতি ৰাহুল গান্ধীয়ে কয় যে বিজেপি আৰু ইয়াৰ আদৰ্শগত আধাৰ সংগঠন আৰ এছ এছে অসমকে ধৰি উত্তৰ-পূবৰ ওপৰত ভয়ংকৰ আক্ৰমণ অব্যাহত ৰাখিছে। উত্তৰ-পূবৰ সকলো ৰাজ্যৰ সংস্কৃতি, ঐতিহ্য, ভাষা, জীৱন প্ৰণালীৰ ওপৰত আৰ এছ এছৰ আদৰ্শগত কাৰ্য্যসূচীৰ আগ্ৰাসন চলিছে।

আৰ এছ এছ-বিজেপিৰ আদৰ্শই এতিয়া অসমৰ লগতে উত্তৰ-পূবৰ প্ৰতিখন ৰাজ্যত জুই জ্বলাই থকাৰ অভিযোগ আনে কংগ্ৰেছৰ সভাপতিজনে।

তেওঁ উত্তৰ-পূবৰ থলুৱা মানুহৰ ভাষা, ঐতিহ্য, সংস্কৃতিৰ স্বকীয়তা আৰু ইয়াৰ মানুহৰ মিলা-প্ৰীতিৰ শলাগ লয়।

“যেতিয়া ২০১৪-অত দিল্লীত নৰেন্দ্ৰ মোদীৰ চৰকাৰ আহিল আৰু তাৰ পাছত অসম-অৰুণাচল প্ৰদেশতো বিজেপি শাসনলৈ আহিল তেতিয়াৰ পৰাই এই অঞ্চলৰ ইতিহাস আৰু সংস্কৃতিৰ ওপৰত আক্ৰমণ আৰম্ভ হৈ গ’ল”, বিজেপিৰ এক সংস্কৃতিৰ ভাৰতৰ লক্ষ্যৰ প্ৰসংগেৰে গান্ধীয়ে কয়।

উত্তৰ-পূবৰ খিলঞ্জীয়া ৰাইজৰ স্বকীয়তাৰ ওপৰত কংগ্ৰেছে এই আক্ৰমণ হৈ থাকিবলৈ নিদিয়ে বুলিও ৰাহুল গান্ধীয়ে সমাৱেশত উপস্থিত জনতাক আশ্বাস দিয়ে।

“আমি উত্তৰ-পূবৰ ইতিহাস, ভাষা-সংস্কৃতি ৰক্ষা কৰিম আৰু নৰেন্দ্ৰ মোদী আৰু মোহন ভাগৱতৰ মুখত উচিত উত্তৰ দিম”, ৰাহুল গান্ধীৰ ঘোষণা।

“আৰ এছ এছে ঘৃণাৰ মনোভাব বিয়পায়” বুলিও কংগ্ৰেছ সভাপতিগৰাকীয়ে উপস্থিতসকলক সোঁৱৰাই দিয়ে। তেওঁ লগতে হাৰিয়ানাত জাঠ সম্প্ৰদায় আৰু অনা-জাঠৰ মাজৰ সংঘৰ্ষ, মহাৰাষ্ট্ৰৰ পৰা বিহাৰ-উত্তৰ প্ৰদেশৰ লোকক খেদি দিয়া, দিল্লীত উত্তৰ-পূবৰ লোকক ভীতিগ্ৰস্ত কৰা, বাংগালুৰুত মহিলাক আক্ৰমণ কৰা আদি ঘটনাসমূহ আৰ এছ এছে বিস্তাৰ কৰা ঘৃণাৰ ফল বুলিও অভিহিত কৰে।

“কংগ্ৰেছে হিন্দুস্তানক এটা ছাতিৰ তলত একগোট কৰিব বিচাৰে য’ত হিংসা বিদ্বেষ নাথাকে”, ৰাহুল গান্ধীৰ মন্তব্য।

ভাৰতৰ প্ৰতিখন ৰাজ্যৰ সকলো ভাষা, সংস্কৃতি, মানুহৰ বিচাৰধাৰা, জীৱন প্ৰণালী এই আটাইবোৰ মিলিয়ে হিন্দুস্তান গঢ় লৈছে বুলি মন্তব্য কৰি তেওঁ কয় যে কাৰোবাৰ অস্তিত্ব আৰু স্বকীয়তাক দমন কৰিব বিচৰা মানে হিন্দুস্তানক আঘাত কৰা।

“কংগ্ৰেছে বিচাৰে বৈচিত্ৰ্যৰ মাজত প্ৰেম আৰু ভাতৃত্ববোধেৰে দেশখন আগবাঢ়ি যাওক। কিন্তু বিজেপিয়ে বিচাৰে দেশৰ ৰাজত্ব নাগপুৰৰ পৰা হওক আৰু এটাই বিচাৰধাৰা, এটাই ভাৱনা দেশত জাপি দিব বিচাৰে”, এক সংস্কৃতিৰ ধাৰণাটোৰ বিৰোধিতা কৰি কংগ্ৰেছৰ সভাপতিজনে কয়।