ফুটুকাৰ ফেনত পৰিণত গুণোৎসৱ; প্ৰথম বৰ্ষৰ ফলাফলৰ ভিত্তিত নহ’ল ব্যৱস্থা; ফলাফল নাই দ্বিতীয় বৰ্ষৰ

বিজেপি শাসনাধীন ৰাজ্য চৰকাৰে ৰাজ্যৰ বিভিন্ন বিভাগত সৰ্বতোপ্ৰকাৰৰ উন্নয়ন হোৱা বুলি ভাষণৰ ফুলজাৰি মাৰিলেও শিক্ষা বিভাগটোৱেই এই কথাৰ অন্তঃসাৰহীনতা প্ৰমাণ কৰি আছে।

যোৱা জানুৱাৰিত ২০১৮ বৰ্ষৰো বৃত্তি পৰীক্ষা হৈ গ’ল, অথচ বিভাগটোৱে ২০১৭ চনৰে বৃত্তি পৰীক্ষাৰ ফলাফল এতিয়ালৈকে দিব নোৱাৰিলে।

ইপিনে ‘চমক সৃষ্টিকাৰী’ গুণোৎসৱত ‘এ প্লাছ’ লাভ কৰা বিদ্যালয়সমূহক ২৫ হাজাৰ টকাকৈ সাহায্য দিয়াৰ কথা আছিল যদিও সেয়া সম্পূৰ্ণকৈ কাৰ্যকৰী নহ’ল। এজনীয়া শিক্ষকৰ বিদ্যালয় চিনাক্ত কৰি সেইমতে ব্যৱস্থা লোৱাৰ কথা আছিল যদিও সেয়াও কৰা নহ’ল। বৰং এজনীয়া শিক্ষকৰ বিদ্যালয় বৃদ্ধি পোৱাৰহে তথ্য পোৱা গৈছে।

যোৱা বৰ্ষৰ অক্টোবৰ-নৱেম্বৰ মাহত অনুষ্ঠিত দ্বিতীয় বৰ্ষৰ গুণোৎসৱৰ ফলাফল তিনিমাহ অতিক্ৰম কৰাৰ পাছতো আনুষ্ঠানিকভাৱে দিয়া নাই চৰকাৰে। বিভাগৰ যি ৱেবছাইট তাত প্ৰথম বৰ্ষৰ গুণৎসৱৰ ফলাফলহে ঘোষণা কৰা আছে। এই কথা জানিবলৈ দিয়ে প্ৰাথমিক শিক্ষক সন্মিলনী, অসমৰ সাধাৰণ সম্পাদক ৰাতুল চন্দ্ৰ গোস্বামীয়ে।

আনহাতে বিদ্যালয়বোৰ সংযুক্তকৰণ (amalgamation) ফলত সৃষ্টি হোৱা সমস্যা সমাধানতো বিভাগটো ব্যৰ্থ হৈছে। amalgamation ৰ ফলত বহুতো প্ৰাথমিক বিদ্যালয়ৰ শিক্ষক উচিত প্ৰাপ্যৰ পৰা বঞ্চিত হ’ল।

শিক্ষাবিভাগৰ এনে কৰ্ম-কাণ্ড দেখি অতিষ্ঠ হৈ পৰিছে প্ৰাথমিক শিক্ষক সন্মিলনী অসম।

নৰ্থ ইষ্ট নাওৰ সৈতে হোৱা টেলিফোনিক বাৰ্তালাপত প্ৰাথমিক শিক্ষক সন্মিলনী অসমৰ সাধাৰণ সম্পাদকগৰাকীয়ে কয়, “গুণোৎসৱৰ নামত এই চৰকাৰে কোনো ধন মোকলাই দিয়া নাই। শিক্ষা বিভাগৰ সমগ্ৰ বিষয়টো পৰিচালনা কৰাত ভুল হৈ আছে।“

ইপিনে, চৰকাৰে ততাতৈয়াকৈ সিদ্ধান্ত লোৱা বাবে শিক্ষা বিভাগটোৱে ঘোষণা কৰা প্ৰতিশ্ৰুতি পূৰণত ব্যৰ্থ হোৱা বুলি তেওঁ মন্তব্য কৰে।

“চৰকাৰে পাতিব লাগে বাবেই ধুম-ধাম গুণোৎসৱ পাতি ল’লে। পূৰ্ণ প্ৰস্তুতি নোহোৱা বাবে এনেবোৰ ঘটনা হৈছে।“ গোস্বামীয়ে এইদৰে আমাৰ আগত কয়।

ইয়াৰোপৰি, দুটা বছৰে শিক্ষা বিভাগটোৱে পঞ্চম শ্ৰেণী আৰু অষ্টম শ্ৰেণীত বৃত্তি পৰীক্ষা অনুষ্ঠিত কৰি বৰ্তমানলৈকে ফলাফল দিব নোৱৰাটোৱে শিক্ষা মন্ত্ৰীৰ বিফলতা উদঙাই দিয়ে বুলি মন্তব্য কৰে গোস্বামীয়ে।

“শিক্ষা মন্ত্ৰী সম্পূৰ্ণৰূপে ব্যৰ্থ হৈছে, তেওঁ নিজৰ বিভাগটো সু-কলমে চলাব পৰা নাই। বৃত্তি পৰীক্ষাৰ ফলাফল, গুণোৎসৱকে ধৰি সকলোবোৰ সমস্যাক কেন্দ্ৰ কৰি ২০১৮ চনৰ ১৯ জুনত শিক্ষা মন্ত্ৰীৰ সৈতে আলোচনা হৈছিল। তেওঁ এই সমস্যাসমূহ সমাধান কৰিবৰ বাবে ৪৫ দিন সময় লৈছিল”, প্ৰাথমিক শিক্ষক সন্মিলনীৰ বিষয়ববীয়াজনে কয়।

তাৎপৰ্যপূৰ্ণভাৱে, ৪৫ দিন বাদেই, বছৰটোৰ অন্ত পৰাৰ পাছতো শিক্ষা মন্ত্ৰীয়ে এই সমস্যাসমূহ সমাধানৰ বাবে কোনো ধৰণৰ ব্যৱস্থা গ্ৰহণ নকৰা বুলি গুৰুতৰ অভিযোগ তোলে।

ইফালে, শিক্ষা বিভাগৰ এই গুৰুত্বহীনতাৰ প্ৰতিবাদত ২৭ ফেব্ৰুৱাৰিৰ পৰা ৰাজ্যৰ সমূহ প্ৰাথমিক বিদ্যালয়ৰ প্ৰধান শিক্ষকসকলে সকলো কাৰ্য্যালয়কেন্দ্ৰিক কাম-কাজ অনিৰ্দিষ্টকাললৈ স্থগিত ৰাখিব বুলি তেওঁ আমাক জানিবলৈ দিয়ে।

আনহাতে, ছাত্ৰ-ছাত্ৰীৰ জীৱনক লৈ এই দুটা গুৰুত্বপূৰ্ণ কথা সন্দৰ্ভত আমি কথা পাতিছিলো শিক্ষা বিভাগৰ আয়ুক্ত সচিব প্ৰীতম শইকীয়াৰ সৈতে। কিন্তু তেওঁ এই সন্দৰ্ভত মন্তব্য প্ৰকাশ কৰাৰ পৰা বিৰত থাকিল।

তেওঁ কয় ‘এই সন্দৰ্ভত মই একেষাৰে একো ক’ব নোৱাৰিম।‘