আজি ধুবুৰী ভ্ৰমণলৈ আহিব কেন্দ্ৰীয় গৃহ মন্ত্ৰী ৰাজনাথ সিং

আজি অসমৰ ধুবুৰীলৈ আহিব কেন্দ্ৰীয় গৃহ মন্ত্ৰী ৰাজনাথ সিং । গৃহ মন্ত্ৰীগৰাকীয়ে জিলাখনত ‘কম্প্ৰিহেনছিভ ইনটিগ্ৰেটেড ব’ৰ্ডাৰ মেনেজমেণ্ট চিষ্টেম’ নামৰ এক অত্যাধুনিক সীমান্ত নিৰীক্ষণ ব্যৱস্থাৰ উদ্বোধনী কাৰ্যসূচী আৰু এখন জনসভাত অংশ ল’ব।

জানিব পৰা মতে আজি দুপৰীয়া প্ৰায় ১২.৩০ মান বজাত গুৱাহাটীৰ পৰা পোনে পোনে সেনাৰ হেলিকপ্টাৰেৰে ধুবুৰী সীমান্তৰ নিৰীক্ষণ চকীত উপস্থিত হ’ব। তাত অত্যাধুনিক সীমান্ত নিৰীক্ষণ ব্যৱস্থাৰ উদ্বোধন কৰাৰ পাছত সেই পদ্ধতিৰে কিদৰে সীমান্তত কটকটীয়া নিৰাপত্তা বেষ্টনি গঢ়ি তুলিব পাৰি সেই সম্পৰ্কত গৃহ মন্ত্ৰীগৰাকীৰ সন্মুখত এক বিৱৰণ প্ৰদৰ্শিত কৰা হ’ব।

এই কাৰ্যসূচীৰ পাছতে গৃহ মন্ত্ৰী সিঙে এখন সংবাদমেল সম্বোধন কৰি পুনৰ হেলিকপ্টাৰেৰে ধুবুৰী ভোলানাথ মহাবিদ্যালয় খেলপথাৰত উপস্থিত হ’ব আৰু তাৰ সমীপতে আয়োজিত এখন দলীয় জনসভাখনত অংশ ল’ব।

উল্লেখ্য যে কেন্দ্ৰীয় গৃহ মন্ত্ৰীগৰাকীৰ এই ভ্ৰমণৰ সময়ছোৱাত অসমৰ মুখ্য মন্ত্ৰী সৰ্বানন্দ সোণোৱালো লগত থাকিব বুলি জানিব পৰা গৈছে।

ইফালে কেন্দ্ৰীয় গৃহ মন্ত্ৰী আৰু মুখ্য মন্ত্ৰীৰ ধুবুৰী ভ্ৰমণক লৈ সীমান্ত সুৰক্ষা বাহিনী আৰু ধুবুৰী জিলা প্ৰশাসন ব্যস্ত হৈ পৰিছে। ইফালে দুয়োগৰাকী নেতাৰ নিৰাপত্তাৰ দিশটো চোৱা-চিতা কৰিবলৈ অসম আৰক্ষীৰ মহাপৰিদৰ্শক দীপক কেডিয়াসহ বহু শীৰ্ষ পৰ্যায়ৰ বিষয়া ইতিমধ্যে ধুবুৰীত উপস্থিত হোৱা বুলি জানিবলৈ দিয়ে।