নিৰ্বাচনমুখী ত্ৰিপুৰাৰ আৰক্ষী প্ৰশাসনত ব্যাপক ৰদবদল

নিৰ্বাচনৰ বতাহ চলি থকা ত্ৰিপুৰাত আজি চৰকাৰে ইয়াৰ আৰক্ষী প্ৰশাসনত ব্যাপক ৰদবদল কৰে। এই প্ৰক্ৰিয়াটোত আৰক্ষী থানাৰ ২১ জন ভাৰপ্ৰাপ্ত বিষয়াকে ধৰি মুঠ ৪৬ জন আৰক্ষী বিষয়াক বদলি কৰা হৈছে। আৰক্ষী বিষয়া ৰদবদলৰ এই তালিকা কালি প্ৰকাশ কৰা হয়।

এ আই জি (আৰক্ষী মুখ্য কাৰ্য্যালয়) আৰ সৰস্বতীয়ে প্ৰকাশিত এই তালিকাখনত স্বাক্ষৰ কৰে।

যদিও এই ব্যাপক ৰদবদল নিৰ্বাচনক লক্ষ্য কৰি বুলি অনুমান কৰিব পাৰি, চৰকাৰী সূত্ৰই ইয়াক নিয়মমাফিক আৰু স্বাভাৱিক ৰদবদল বুলিহে দাবী কৰিছে। প্ৰশাসন উন্নত কৰা আৰু সুচল আইন-শৃংখলা পৰিস্থিতি বজাই ৰখাৰ বাবে এই ৰদবদল কৰা হৈছে বুলি চৰকাৰী সূত্ৰটোৱে কয়।

ইয়াৰ উপৰি আৰক্ষী থানাবোৰত আৰক্ষীৰো লোকসকলৰ সঞ্চালন উন্নত কৰাৰ স্বাৰ্থত নতুন গাড়ীৰ যোগান ধৰাৰ ব্যৱস্থা কৰা হৈছে।

উল্লেখযোগ্য যে আৰক্ষীয়ে ব্যৱহাৰ কৰি থকা বেছিভাগ গাড়ীয়েই ব্যৱহাৰৰ অনুপযোগী হৈ পৰিছে।

সূত্ৰটোৱে কৈছে যে ইয়াৰে ৮-১০খন গাড়ী প্ৰথম খেপত আৰু বাকীবোৰ পিছৰ খেপত নিৰ্বাচনৰ পিছত শীঘ্ৰেই যোগান ধৰা হ’ব।