লোকসভা নিৰ্বাচন : ডিব্ৰুগড়ত প্ৰবীন কংগ্ৰেছ নেতা পৱন সিং ঘাটোৱাৰৰ মনোনয়ন দাখিল

আগন্তুক লোকসভা নিৰ্বাচনৰ বাবে ডিব্ৰুগড় লোকসভা সমষ্টিৰ কংগ্ৰেছ দলৰ প্ৰাৰ্থী তথা দলটোৰ প্ৰবীন নেতা পৱন সিং ঘাটোৱাৰে আজি নিজৰ মনোনয়ন পত্ৰ দাখিল কৰে। তেওঁৰ উপৰি আন ৬ গৰাকী প্ৰাৰ্থীয়েও আজি সমষ্টিটোৰ পৰা মনোনয়ন দাখিল কৰে।

মনোনয়ন পত্ৰ দাখিলৰ পিছত সাংবাদিকৰ আগত ঘাটোৱাৰে অহা নিৰ্বাচনত কংগ্ৰেছে ভাল ফল দেখুৱাব বুলি মন্তব্য কৰি কয়, ‘আমি নিৰ্বাচনত জিকিলে সদনত নাগৰিকত্ব সংশোধনী বিধেয়কৰ তীব্ৰ বিৰোধিতা কৰিম। ডিব্ৰুগড়ৰ পৰা প্ৰতিদ্বন্দ্বিতা আগবঢ়োৱা আন প্ৰাৰ্থীসকললৈ মোৰ ফালৰ পৰা শুভেচ্ছা জনাইছো।‘

তেওঁ লগতে কয় যে বৰ্তমানৰ বিজেপি চৰকাৰে তেওঁলোকৰ প্ৰতিশ্ৰুতি পালন কৰাত সম্পূৰ্ণৰূপে ব্যৰ্থ হৈছে।

উল্লেখযোগ্য যে ডিব্ৰুগড় লোকসভা সমষ্টিৰ পৰা এইবাৰ মুঠ ৮ গৰাকী প্ৰাৰ্থীয়ে মনোনয়ন দাখিল কৰিছে। ঘাটোৱাৰৰ উপৰি আজি মনোনয়ন পত্ৰ দাখিল কৰা আন ৬ গৰাকী প্ৰাৰ্থী হৈছে ভৱেন বৰুৱা (এন পি পি), অপূৰ্ব শইকীয়া (নিৰ্দলীয়), ইছৰাইল নন্দ (নিৰ্দলীয়), ৰুবুল বুঢ়াগোহাঁই (নিৰ্দলীয়), টিটুছ ভেংৰা (নিৰ্দলীয়) আৰু নুৰুল হুদা (নিৰ্দলীয়)।

আনহাতে সমষ্টিটোৰ বিজেপি দলৰ প্ৰাৰ্থী তথা বৰ্তমানৰ সাংসদ ৰামেশ্বৰ তেলীয়ে যোৱা ২২ মাৰ্চত সদল বলে গৈ ডিব্ৰুগড়ৰ নিৰ্বাচনী ৰিটাৰ্নিং বিষয়াৰ কাৰ্যালয়ত মনোনয়ন পত্ৰ দাখিল কৰিছিল।