উপঢৌকন লোৱাৰ বাবে গ্ৰেপ্তাৰ নিৰ্বাচন বিভাগৰ কাৰ্যালয়ৰ মহিলা কৰ্মচাৰী

অসম আৰক্ষীৰ দুৰ্নীতি নিবাৰক ও তদাৰকী শাখাই উপঢৌকন লোৱাৰ অপৰাধত বৃহস্পতিবাৰে সন্ধিয়া কাছাৰ জিলা নিৰ্বাচন বিভাগৰ কাৰ্যালয়ৰ এগৰাকী কৰ্মচাৰীক গ্ৰেপ্তাৰ কৰে।

আৰক্ষী বিষয়াই জানিব দিয়ে যে দুৰ্নীতি নিবাৰক ও তদাৰকী শাখাৰ এটা নজনীয়া দলে কাছাৰ জিলা নিৰ্বাচন কাৰ্যালয়ৰ মুখ্য সহায়কাৰী আতশী দত্ত তৰফদাৰক তেওঁৰ কাৰ্যালয়ৰ কক্ষৰ ভিতৰত এগৰাকী ছপাশালৰ গৰাকীৰ পৰা উপঢৌকন লোৱাৰ সময়তে হাতে লোটে গ্ৰেপ্তাৰ কৰে।

সূত্ৰসমূহে কয় যে মহিলা কৰ্মচাৰীগৰাকীয়ে শিলচৰৰ এটা ছপাশালৰ গৰাকী সুজিত চন্দাৰ পৰা তেওঁৰ ২.৫ লাখ টকাৰ অনাদায় বিল মুকলি কৰি দিয়াৰ বাবদ নগদ ৯৫,০০০ টকা দাবী কৰিছিল।

সুজিতে দাখিল কৰা এক অভিযোগৰ ওপৰত ভিত্তি কৰি দুৰ্নীতি নিবাৰক ও তদাৰকী শাখাৰ দলটোৱে ৰচা ফান্দত ভৰি দি তেওঁ নগদ ৩০,০০০ টকা লৈ থকা অৱস্থাতে ধৰা পৰে।

সূত্ৰসমূহে কয় যে কৰ্মচাৰীগৰাকীৰ বিৰুদ্ধে দুৰ্নীতি প্ৰতিৰোধ আইন,১৯৮৮ৰ ধাৰা ৭(এ)ৰ অধীনত ৪/২০১৯ নম্বৰৰ এটা গোচৰ ৰুজু কৰা হৈছে।

‘’ মোৰ ২.৫ লাখ টকাৰ বিল মুকলি কৰি দিয়াৰ বাবে তেওঁ ৯৫,০০০ টকা দাবী কৰিছিল। যেতিয়া মই তেওঁক কিছু ছপাৰ কামৰ নিৰ্দেশ দিবলৈ অনুৰোধ কৰিছিলো, তেওঁ তেওঁৰ ধন খিনি নিদিয়াৰ বাবে কোনো ছপাৰ নিৰ্দেশ দিবলৈ অস্বীকাৰ কৰিছিল,’’-সুজিত চন্দাই নৰ্থইষ্ট নাওৰ আগত কয়।

‘’তেওঁ মোক ফোন কৰি মোক বহুত হাৰাশাস্তি কৰিছিল যাৰবাবে মই চিবিআইক অৱগত কৰিছিলো। চিবিআয়ে মোক ৰাজ্যিক দুৰ্নীতি নিবাৰক ও তদাৰকী সঞ্চালকালয়ক অৱগত কৰাবলৈ ক’লে,’’-তেওঁ লগতে কয়।

দুৰ্নীতি নিবাৰক ও তদাৰকী শাখাৰ দলটোৱে লগতে ধৃত কৰ্মচাৰীগৰাকীৰ জিম্মাৰ পৰা ২,৭৪,৫০০ টকা উদ্ধাৰ কৰে।

ধৃত মহিলা কৰ্মচাৰীগৰাকীক চিকিৎসাজনিত পৰীক্ষা কৰাৰ লগতে নিশাটোৰ বাবে শিলচৰ সদৰ থানাৰ মহিলা চেলত ৰখা হয়।

আজি তেওঁৰ ঘৰতো তালাচী চলোৱাৰ পাছত পৰৱৰ্তী জেৰাৰ বাবে গুৱাহাটীলৈ নিয়া হ’ব বুলি নাম প্ৰকাশত অনিচ্ছুক এগৰাকী আৰক্ষী বিষয়াই জানিবলৈ দিয়ে।