জানুৱাৰিৰ ২০ তাৰিখে অনুষ্ঠিত হ’ব ইণ্ডিয়া ক্লাবৰ শতবৰ্ষীয় কুইজ মহোৎসৱ

তৈলক্ষেত্ৰ নগৰী ডিগবৈৰ প্ৰসিদ্ধ সামাজিক-সাহিত্যৰ সংস্থা ইণ্ডিয়া ক্লাবে শতবৰ্ষীয় কুইজ মহোৎসৱ ২০১৮ৰ বাবে সম্পূৰ্ণ সাজু বুলি জনাইছে। জানুৱাৰিৰ ২০ তাৰিখে হ’বলগীয়া কুইজ মহোৎসৱখন ইণ্ডিয়া ক্লাব অডিটৰিয়ামত দিনযোৰা কাৰ্যসূচীৰে অনুষ্ঠিত হ’ব।

ডিগবৈৰ লায়ন্স ক্লাব আৰু ডিগবৈ কুইজ মঞ্চই আয়োজন কৰা সদৌ অসম ভিত্তিত  মুকলি কুইজ প্ৰতিযোগিতাখন দুটা শিতানত অনুষ্ঠিত হ’ব। ইয়াৰে এটা হ’ল সাধাৰণ মুকলি কুইজ আৰু আনটো হ’ল লিখিত কুইজ।

উদযাপন সমিতিৰ বিষয়াই জানিবলৈ দিয়া অনুসৰি এই কুইজ প্ৰতিযোগিতাত সৰ্বমুঠ ৩৫ হেজাৰ টকাৰ পুৰস্কাৰ প্ৰদান কৰা হ’ব। ইয়াৰে মুকলি শিতানত প্ৰথম পুৰস্কাৰ প্ৰাপ্তগৰাকীক ১০হেজাৰ, দ্বিতীয় আৰু তৃতীয়গৰাকীক ক্ৰমে ৮ আৰু ৬ হেজাৰেৰে পুৰস্কৃত কৰিব। আনহাতে লিখিত শাখাত মুঠ নগদ ৯ হেজাৰ টকাৰ পুৰস্কাৰ প্ৰদান কৰিব বুলি আয়োজক সমিতিয়ে জানিব দিছে।

উল্লেখযোগ্য যে কুইজ প্ৰতিযোগিতাখনত অংশগ্ৰহণ কৰা দলত মুঠ দুগৰাকীকৈ সদস্যই ভাগ ল’ব পাৰিব লগতে চূড়ান্ত পৰ্যায়ত শীৰ্ষ পৰ্যায়ৰ বিদ্যালয়লৰ বাবে দুটা ঠাই সংৰক্ষিত থাকিব বুলি আয়োজকৰ ফালৰ পৰা জানিব পৰা গৈছে। প্ৰতিযোগিতাখন আৰম্ভ হোৱাৰ পূৰ্বে ২০ জানুৱাৰিৰ দিনা দুপৰীয়া ১২ বজাৰ পৰা ইণ্ডিয়া ক্লাবৰ কাৰ্যালয়ত প্ৰতিযোগীসকলৰ নাম পঞ্জীয়ন কৰা হ’ব আৰু তাৰ পিছতে ১ বজাৰ পৰা বহু প্ৰত্যাশিত প্ৰতিযোগিতাখনৰ শুভাৰম্ভ হ’ব।

ডিগবৈ কুইজ মঞ্চৰ সাধাৰণ সম্পাদক তথা মহোৎসবৰ পৰিচালক শাক্য সামিক কৰ খাউণ্ডে সংবাদ মাধ্যমৰ আগত কয় যে ঐতিহাসিক ইণ্ডিয়া ক্লাবে বিগত সময়ছোৱাত সাহিত্য, শিক্ষা, সামাজিক-অৰ্থনৈতিক তথা অন্যান্য বিষয়ত সদায় অগ্ৰণী ভূমিকা গ্ৰহণ কৰি আহিছে।

কুইজ মাষ্টাৰখ্যাত খাউণ্ড হিন্দু কলেজ আৰু আম্বেদকাৰ বিশ্ববিদ্যালয়ৰ প্ৰাক্তন কুইজ সভাপতি হিচাপে যথেষ্ট খ্যাতি অৰ্জন কৰিবলৈ সক্ষম হৈছিল। স্মৰ্তব্য যে খাউণ্ডৰ উপস্থিতিয়ে কুইজ প্ৰতিযোগিতাত অংশগ্ৰহণ কৰিবলগীয়া প্ৰতিযোগীসকলক যথেষ্ট উৎসাহিত কৰিব বুলি ধাৰণা কৰা হৈছে।