‘অপমান সহিব নোৱাৰি’ প্ৰাক্তন অগপ মন্ত্ৰী যতীন মালীয়ে যোগ দিলে কংগ্ৰেছত

পলাশবাৰী সমষ্টিৰ পৰা চাৰিবাৰকৈ বিধানসভালৈ নিৰ্বাচিত হোৱা তথা অগপ চৰকাৰৰ দিনত মন্ত্ৰিত্ব লাভ কৰা যতীন মালীয়ে আজি আঞ্চলিক দলটোৰ সংগ এৰি আনুষ্ঠানিকভাৱে যোগদান কৰিলে কংগ্ৰেছত।

প্ৰদেশ কংগ্ৰেছৰ সভাপতি ৰিপুন বৰা, জ্যেষ্ঠ নেতা ডাঃ ভূমিধৰ বৰ্মন আৰু ৰাষ্ট্ৰীয় নেতা তথা পঞ্জাৱৰ বিত্ত মন্ত্ৰী মনপ্ৰীত সিং বাদলৰ উপস্থিতিত পত্নীসহ কংগ্ৰেছত যোগ দিয়ে মালীয়ে।

কংগ্ৰেছত যোগদানৰ পাছতেই প্ৰাক্তন বিধায়ক মালীয়ে অগপ নেতৃত্বৰ প্ৰতি তীব্ৰ বিষোদগাৰ প্ৰকাশ কৰা পৰিলক্ষিত হয়। তেওঁ কয়, ‘অগপৰ এতিয়া অতি বেয়া অৱস্থা। এই দলটোত আৰু থাকিব পৰা অৱস্থা নাই। অতুল বৰাৰ নেতৃত্বত অসম গণ পৰিষদ দল এতিয়া বন্ধ হৈ যোৱাৰ পথত’।

ইয়াৰ উপৰি নাগৰিকত্ব বিধেয়কক লৈ মিত্ৰতা ত্যাগ কৰা অগপই পুনৰবাৰ বিজেপিৰে মিত্ৰতা কৰা প্ৰসংগতো তীব্ৰ অসন্তুষ্টি প্ৰকাশ কৰা মালীয়ে কয়, ‘অগপই লাজ মান কাটি কৰি বিজেপিৰ লগ লাগিল। আমি সেই অপমান সহি থাকিব নোৱাৰিলো’।

আনহাতে অগপৰ সভাপতি অতুল বৰাকো কটাক্ষ কৰা দেখা যায় যতীন মালীয়ে। তেওঁ কয় যে সভাপতি অতুল বৰাৰ নেতৃত্বত অগপ ফেইল মাৰিছে, চাৰি-পাঁচজনক লগত লৈ দলটো এতিয়া লাজ লগা অৱস্থালৈ লৈ গৈছে।

আঞ্চলিকতাবাদ ত্যাগ কৰি ৰাষ্ট্ৰীয় দল কংগ্ৰেছত যোগদান কৰা মালীয়ে কংগ্ৰেছক অসমৰ ত্ৰাণকৰ্তা আখ্যা দি ২০২১ত অসমত পুনৰ কংগ্ৰেছে চৰকাৰ গঠন কৰিব বুলি দাবী কৰে। তদুপৰি পলাশবাৰী সমষ্টিত কংগ্ৰেছ দলক শক্তিশালী কৰিবলৈ প্ৰচেষ্টা চলাব বুলি কয়।