কাইলৈ বৰ্ণাঢ্য কাৰ্য্যসূচীৰে জজ খেলপথাৰত সদৌ গুৱাহাটী ছাত্ৰ সন্থাৰ মুকলি বিহু

কাইলৈ অসমীয়া জাতিৰ আয়ুখ ৰেখা, জনজীৱনৰ সুঘ্ৰাণ হেপাহৰ ৰঙালী বিহু। গছৰ নতুন পাত আৰু কুলি কেতেকীৰ মাতেৰে আদৰা ৰঙালী বিহুটিয়ে বছৰটোলৈ অসমীয়া জাতিটোক সমৃদ্ধ কৰি ৰাখে।

প্ৰতিবছৰৰ দৰে এইবাৰো সদৌ গুৱাহাটী ছাত্ৰ সন্থাই ১৪ এপ্ৰিল গৰু বিহুৰ দিনা গুৱাহাটীৰ জজ খেলপথাৰত মুকলি বিহুৰ আয়োজন কৰিছে। বিশিষ্ট শিল্পী কুল বৰুৱাই বিহুৰ পতাকা উত্তোলনেৰে কাৰ্য্যসূচীৰ শুভাৰম্ভ কৰিব।

অনুষ্ঠানত সদৌ অসম ছাত্ৰ সন্থাৰ সভাপতি দিপাংক কুমাৰ নাথে আছুৰ পতাকা আৰু সম্পাদক লুৰিণ জ্যোতি গগৈয়ে শ্বহীদ সকলক সন্মান জনাই শ্বহীদ তৰ্পন কৰিব।

অনুষ্ঠানত অসমৰ বিভিন্ন জাতি-জনগোষ্ঠীৰ বিহু নৃত্য, দৰঙৰ ওজাপালি আৰু ভালেকেইটা বিহু হুচৰিৰ দলে অংশ গ্ৰহণ কৰিব। সদ্য প্ৰয়াত বিশিষ্ট কণ্ঠশিল্পী দিপালী বৰঠাকুৰৰ সোঁৱৰণত সংগীত অনুষ্ঠানো আয়োজন কৰিছে উদ্যোক্তা সমিতিয়ে।

মুকলি বিহুৰ লগত সংগতি ৰাখি সদৌ অসম ছাত্ৰ সন্থাই ৰাজ্যখনৰ বিভিন্ন ক্ষেত্ৰলৈ অৱদান আগবঢ়োৱা ভালেসংখ্যক ব্যক্তিক সম্বৰ্ধনা জ্ঞাপন কৰিব। আছুৰ মুখ্য উপদেষ্টা ড০ সমুজ্জ্বল কুমাৰ ভট্টাচাৰ্য্যই আছুৰ হৈ ব্যক্তিসকললৈ সম্বৰ্দ্ধনা আগবঢ়াব।

সম্বৰ্দ্ধনা জনাবলগীয়া বিশিষ্ট ব্যক্তিসকল হ’ল ক্ৰমে- ভাৰতৰ সৰ্বোচ্চ অসামৰিক সন্মান ভাৰত ৰত্ন বঁটা প্ৰাপক ভূপেন হাজৰিকাৰ পৰিয়ালবৰ্গ, পদ্মশ্ৰী বঁটা বিজয়ী ডাঃ ইলিয়াছ আলী আৰু উদ্ভাৱক উদ্ধৱ কুমাৰ ভৰালী,  সংগীত নাটক অকাডেমি বঁটাপ্ৰাপক জগন্নাথ বায়ন, নুৰুদ্দিন আহমেদ, ৰামকৃষ্ণ তালুকদাৰ, সাহিত্য অকাডেমি বঁটাপ্ৰাপক সনন্ত তাঁতি, লোকনাথ উপাধ্যায় চাপাগেই, ঋতুৰাজ বসুমতাৰী, নবীন ব্ৰহ্ম, পাৰ্থপ্ৰতিম হাজৰিকা, যুগল লোচন দাস, সীতাৰাম বসুমতাৰী, সাহিত্য অকাডেমি যুৱ বঁটাপ্ৰাপ্ত পূৰ্ণ ব্ৰহ্ম, বিপাশা বৰা, অৰ্জুন পুৰস্কাৰ বিজয়ী দৌৰ ৰাণী হিমা দাস।