ছাত্ৰ-ছাত্ৰীৰ জীৱনৰ লগত হেতালি খেলি মহৰ্ষি বিদ্যা মন্দিৰে অনুষ্ঠিত কৰিলে পৰীক্ষা

কালি কামৰূপ মহানগৰ জিলা প্ৰশাসনে জিলাখনৰ সকলো বিদ্যালয়, মহাবিদ্যালয়, বিশ্ববিদ্যালয়কে ধৰি সকলো শিক্ষানুষ্ঠান, হোষ্টেল, কোচিং চেণ্টাৰ বন্ধ ৰখাৰ বাবে নিৰ্দেশনা জাৰি কৰিছিল।

কিন্তু সেই নিৰ্দেশনাক চৰম ভেঙুচালি মহানগৰীৰ শিলপুখুৰীস্থিত মহৰ্ষি বিদ্যা মন্দিৰৰ।

কালি জিলা উপায়ুক্তৰ নিৰ্দেশনাৰ পাছতো আজি বিদ্যালয়খন খোলা ৰখাৰ লগতে নৱম শ্ৰেণীৰ ব্যৱহাৰিক পৰীক্ষাও অনুষ্ঠিত কৰে।

এই পৰীক্ষা অনুষ্ঠিত কৰিবৰ বাবে কোনোধৰণৰ অনুমতি জিলা প্ৰশাসনৰ পৰা লোৱা নাই বুলি জনায় ব্যক্তিগত বিদ্যালয়খনৰ অধ্যক্ষই।

সামাজিক দূৰত্ব মানি বাতৰি কৰিবলৈ যোৱাৰ পাছতো সাংবাদিকে প্ৰশ্ন কৰাত অধক্ষই ওলোটাই ক’লে “I am a diabetic patient, অলপ দূৰত থাকক,,,।

ইপিনে, হাতত কামৰূপ মহানগৰ জিলা উপায়ুক্তৰ নিৰ্দেশনাখন লৈ অধ্যক্ষগৰাকীৰ ভাষ্য “মই টিভি ইমান নাচাও গতিকে গম পোৱা নাছিলো। মই ১০ বজাতহে নিৰ্দেশনাটো পাইছো, আমাৰ বিদ্যালয়ত শিক্ষক এজন কোভিড পজিটিভ হৈছিল সেয়েহে ১৯ এপ্ৰিলৰ পৰা বিদ্যালয় বন্ধ ৰখা হৈছিল।”

অৰ্থাৎ শিক্ষকজন কোভিড পজিটিভ হোৱাৰ সপ্তম দিনাই বিদ্যালয় মুকলি কৰি পৰীক্ষা অনুষ্ঠিত কৰি ছাত্ৰ-ছাত্ৰীৰ জীৱনক লৈ হেতালি খেলিলে বিদ্যালয়খনৰ কৰ্তৃপক্ষই।

ইপিনে, মহানগৰীত কোভিডে ভয়াবহ ৰূপ ধাৰণ কৰাৰ বাবেই শিক্ষা প্ৰতিষ্ঠান বন্ধ দিয়াৰ নিৰ্দেশনা দিছিল যদিও অধক্ষৰ দাবী “আমি কোভিড প্ৰট’কল মানিহে পৰীক্ষা অনুষ্ঠিত কৰিছো।”