নিৰ্বাচনী উত্তাপৰ মাজতে গুৱাহাটীত জব্দ বিশাল পৰিমাণৰ ধন

নিৰ্বাচনী আচৰণ বিধি চলি থকাৰ মাজতেই ভোটাৰক প্ৰভাৱান্বিত কৰিবলৈ একাংশ ৰাজনৈতিক দল তথা প্ৰাৰ্থীয়ে অসৎ উপায় অৱলম্বন কৰাৰ বিষয়টো চৰ্চিত হৈ থকাৰ মাজতেই গুৱাহাটী মহানগৰীত জব্দ হৈছে বৃহৎ পৰিমাণৰ ধন।

বুধবাৰে দিন দুপৰতে আৰক্ষী আৰু ফ্লাইং স্কুৱাডৰ দলে নুনমাটিৰ চূণচালিত ২৫ লাখ ১১ হাজাৰ টকা উদ্ধাৰ কৰে। অঞ্চলটোৰ জয়ৰামপুৰ নামৰ ঠাইডোখৰত অভিযান চলাই এখন বাহনৰ পৰা এই বৃহৎ পৰিমাণৰ ধনৰাশি জব্দ কৰিবলৈ সক্ষম হয়।

নুনমাটি আৰক্ষী থানাৰ ভাৰপ্ৰাপ্ত বিষয়াগৰাকীয়ে জানিবলৈ দিয়া মতে দিনৰ ১ মান বজাত তালাচী চলাওঁতে অমৃত চন্দ্ৰ ডেকা নামৰ লোকজনৰ বাহনত এই টকাখিনি লাভ কৰে।

আৰক্ষীয়ে জনোৱামতে টকাখিনি লৈ অহা লোকজনে সেয়া ব্যৱসায়ৰ টকা বুলি দাবী কৰিছে আৰু তেওঁ বেংকত জমা থ’বলৈ নিয়া বুলি প্ৰকাশ কৰিছে। কিন্তু লোকজনে এই ধনখিনি সন্দৰ্ভত সঠিক তথ্য দিব পৰা নাই বুলিও আৰক্ষী সূত্ৰই প্ৰকাশ কৰিছে।

সন্দেহজনক ধনখিনি জব্দ কৰা হৈছে যদিও এই পৰ্য্যন্ত আৰক্ষীয়ে ঘটনাটো সন্দৰ্ভত কোনো লোকক আটক কৰা নাই।