বাংলাদেশে কেতিয়াও ত্ৰিপুৰীসকলৰ অৱদানৰ কথা নাপাহৰে : বাংলাদেশৰ প্ৰতিনিধি

বাংলাদেশৰ মুক্তিযুঁজত ভাৰতৰ বৰঙনিৰ কথা শ্ৰদ্ধা আৰু কৃতজ্ঞতাৰ সৈতে উল্লেখ কৰিছে ত্ৰিপুৰা ভ্ৰমণলৈ অহা বাংলাদেশৰ প্ৰতিনিধিসকলে। বাংলাদেশৰ সহকাৰী উচ্চায়ুক্ত কীৰ্তি চাকমা আৰু উচ্চ পৰ্য্যায়ৰ এটা প্ৰতিনিধি দলে ৰাজ্যখনৰ চিপাহীজেলাৰ মেলাঘৰ নামৰ গাওঁখন ভ্ৰমণ কৰোঁতে ভাৰতৰ ভূমিকাক প্ৰশংসা কৰে।

“বাংলাদেশৰ মুক্তিযুদ্ধত ত্ৰিপুৰীসকলৰ বৰঙনি অতি বিশাল। বাংলাদেশে এইটো কেতিয়াও নাপাহৰে।” বাংলাদেশ উচ্চ ন্যায়ালয়ৰ অতিৰিক্ত এটৰ্নি জেনেৰেল ছাহিদুৰ ৰহমানে কয়।

ভাৰতৰ শক্তিশালী যুদ্ধাস্ত্ৰ আৰু সেনাৰ গুৰুত্বপূৰ্ণ ভূমিকাৰ বিষয়ে উল্লেখ কৰি কয়, “ভাৰতে আমাৰ মুক্তিৰ বাবে কৰা সংগ্ৰামত সক্ৰিয় ভূমিকা লৈছিল। ইন্দিৰা গান্ধীয়ে (তদানীন্তন প্ৰধান মন্ত্ৰী) আকাশমাৰ্গ আৰু ভূখণ্ডেৰে আক্ৰমণৰ নিৰ্দেশ দিছিল। ভাৰতৰ পশ্চিম বংগ, অসম আৰু ত্ৰিপুৰাৰ পৰা তিনি দিশৰ পৰা আক্ৰমণ চলাইছিল”।

যুদ্ধৰ সময়ছোৱাত ১৯৭১ খ্ৰীষ্টাব্দত ত্ৰিপুৰাৰ এই অঞ্চলত (মেলাঘৰত) বাংলাদেশ স্বাধীনতা যুদ্ধৰ দ্বিতীয়টো মুখ্য কাৰ্য্যালয় স্থাপন কৰা হৈছিল।

উল্লেখযোগ্য যে ত্ৰিপুৰাই যুদ্ধ বিভীষিকাত ভগনীয়া হোৱা বাংলাদেশী লোকক আশ্ৰয়, সাহায্য দিয়াৰ লগতে সেই সময়ত ত্ৰিপুৰী লোকসকলৰ সঁহাৰি অতিশয় সংবেদনশীল আৰু মানবীয় আছিল।