পৰিবেশ সংৰক্ষণৰ অনন্য প্ৰয়াস সাংবাদিকৰ; ছাত্ৰ-ছাত্ৰীৰ মাজত গছপুলি বিতৰণ

পৰিবেশ সংৰক্ষণৰ ওপৰত সজাগতা বৃদ্ধিৰ লগতে সেউজীয়া পৰিবেশ গঢ়ি তোলাৰ উদ্দেশ্যেৰে হাফলং প্ৰেছ ক্লাবে আৰম্ভ কৰা গছপুলি বিতৰণ কাৰ্যসূচীৰ অংশ স্বৰূপে বুধবাৰে ডিমা হাচাও বন আৰু পৰিবেশ বিভাগৰ যুটীয়া উদ্যোগত হাফলং কেন্দ্ৰীয় বিদ্যালয়ত গছপুলি বিতৰণ কৰে।

গছপুলি বিতৰণ সন্দৰ্ভত কেভিৰ অধ্যক্ষ মনোজ কুমাৰে হাফলং প্ৰেছ ক্লাবৰ এনে মহৎ পদক্ষেপক আদৰণি জনোৱাৰ লগতে ছাত্ৰ-ছাত্ৰী সকলক গছপুলি সযতনে ৰোপন কৰাৰ লগতে সেউজীয়া পৃথিৱী গঢ়ি তোলাৰ আহ্বান জনায়।

শীৰ্ষ বন বিষয়া এম তুংগনুঙে কয় যে গছ-গছনি কমি অহাৰ বাবে গোলকীয় উষ্ণতা বৃদ্ধি পাইছে। সেই কাৰণে যিমান পাৰি গছ ৰোপন কৰাৰ প্ৰয়োজন আহি পৰিছে।

গছপুলি বিতৰণ কাৰ্যসূচীত হাফলং কেভিৰ দশম-একাদশ শ্ৰেণীৰ ছাত্ৰ-ছাত্ৰী সকলে ভাগ লৈ গছ ৰোপনৰ প্ৰয়োজনীয়তাৰ ওপৰত নিজ নিজ বক্তব্য দাঙি ধৰে।

আনহাতে হাফলং প্ৰেছ ক্লাবৰ সভাপতি অনুপ কুমাৰ বিশ্বাসে কয়, ‘গছপুলি বিতৰণৰ যোগেদি ছাত্ৰ সমাজৰ মাজত পৰিবেশ সংৰক্ষণৰ ওপৰত অধিক সজাগতা গঢ়ি তোলাই আমাৰ প্ৰধান উদ্দেশ্য’।

গছপুলি বিতৰণ কাৰ্যসূচীত ডিমা হাচাও বন আৰু পৰিবেশ বিভাগৰ চিফ কনজাৰ্ভেটৰ অব ফৰেষ্ট (CCF) এম তুংগনুং, হাফলং কেন্দ্ৰীয় বিদ্যালয়ৰ অধ্যক্ষ মনোজ কুমাৰ, হাফলং প্ৰেছ ক্লাবৰ সভাপতি অনুপ কুমাৰ বিশ্বাস, সাধাৰন সচিব বিপ্লৱ দেব, ক্লাবৰ কোষাধ্যক্ষ পংকজকুমাৰ দেব, সংবাদ কৰ্মী প্ৰশান্ত ভট্টাচাৰ্য, পংকজ টিমুঙ, সূৰজ বৰ্মণ আদি উপস্থিত থাকে।

ইয়াৰ উপৰি এই কাৰ্যসূচীত হাফলং কেভিৰ অধ্যক্ষ তথা শিক্ষক-শিক্ষয়ত্ৰীসকল উপস্থিত আছিল।