অৰুণাচলৰ জয়ৰামপুৰত দ্বিতীয় বিশ্ব যুদ্ধৰ স্মাৰক সংগ্ৰাহলয় উদ্বোধন

অৰুণাচল প্ৰদেশৰ মুখ্য মন্ত্ৰী পেমা খাণ্ডূৱে দেওবাৰে চাংলাং জিলাৰ জয়ৰামপুৰত এটা দ্বিতীয় বিশ্ব যুদ্ধৰ স্মাৰক সংগ্ৰহালয় উদ্বোধন কৰে।

সংগ্ৰহালয়টোৰ উদ্বোধনী অনুষ্ঠানত মুখ্য মন্ত্ৰীৰ উপৰি অৰুণাচল প্ৰদেশৰ শিক্ষা মন্ত্ৰী হনচুন নাংদাম, বিজেপিৰ ৰাজ্যিক সভাপতি তাপিৰ গাও, সংসদীয় সচিব লাইচাম চিমাই, তেচাম পংটে, তাগে তাকী আৰু কানুবাৰীৰ বিধায়ক গেব্ৰিয়েল ৱাংচু উপস্থিত থাকে।

প্ৰাপ্ত তথ্য মতে গড়কাপ্টানী বিভাগৰ দ্বাৰা নিৰ্মিত আৰু কেন্দ্ৰীয় চৰকাৰে পুঁজি যোগান ধৰা সংগ্ৰহালয়টো নিৰ্মাণত  ২.২৫ কোটি টকা ব্যয় হৈছে।

উক্ত সংগ্ৰহালয়টোত স্থানীয় লোকসকলৰ পৰা সংগ্ৰহ কৰা দ্বিতীয় বিশ্ব যুদ্ধৰ ভগ্নাৱশেষৰ লগতে সৈনিক সকলৰ ব্যক্তিগত সামগ্ৰী আদি সংৰক্ষণ কৰি ৰখা হৈছে। তাৰোপৰি সংগ্ৰহালয়টোত স্থানীয় তাংচা সম্প্ৰদায়ৰ বিভিন্ন পৰম্পৰাগত সামগ্ৰী সংৰক্ষণ কৰি ৰকা হৈছে।

উল্লেখযোগ্য যে অসম ৰাইফলচে ১৯৯৭ চনত উদ্ধাৰ কৰা সমাধি ক্ষেত্ৰটোত যুদ্ধৰ লগতে ষ্টিলৱেল পথৰ নিৰ্মাণত নিহত হোৱা লোকৰ প্ৰায় ৮৩৩ টা সমাধি আছে বুলি সংগ্ৰহালয়টোৰ এগৰাকী বিষয়াই জানিবলৈ দিয়ে।

সমাধি ক্ষেত্ৰটোক সঠিক ৰূপত উন্নীত কৰিলে ই পৰ্যটকক আকৰ্ষিত কৰাৰ যথেষ্ট সম্ভাৱনা আছে বুলি মুখ্য মন্ত্ৰী গৰাকীয়ে স্থানীয় নেতা আৰু বিষয়া সকলৰ লগত কৰা আলোচনাত উল্লেখ কৰে। তেওঁ এই ক্ষেত্ৰত চৰকাৰৰ ফালৰ পৰা সকলো ধৰণৰ সহায় আগবঢ়োৱা হ’ব বুলি জানিবলৈ দিয়ে।