ৰাজ্যসভাৰ নিৰ্বাচন : ভোট দিব নোৱাৰিব সাংসদ নিৰ্বাচিত তিনিজন বিধায়কে

অহা ৭ জুনত অনুষ্ঠিত হ’ব লগীয়া অসমৰ ৰাজ্যসভাৰ নিৰ্বাচনত ভোট দিব নোৱাৰিব সাংসদ হিচাপে নিৰ্বাচিত বিজেপিৰ তিনিজন বিধায়কে। তেওঁলোক হ’ল- সোণাৰি সমষ্টিৰ তপন গগৈ, ৰঙাপৰা সমষ্টিৰ বিধায়ক পল্লৱলোচন দাস আৰু ৰাতাবাৰীৰ কৃপানাথ মল্লা।

তিনিওজন বিধায়কৰ বিধায়ক পদ ৰাজ্যসভাৰ নিৰ্বাচনৰ পূৰ্বেই খাৰিজ হ’ব। সংবিধানৰ নিয়ম অনুসৰি নিৰ্বাচন আয়োগে নিৰ্বাচনৰ ফল আনুষ্ঠানিকভাৱে ঘোষণা কৰাৰ ১৪ দিনৰ ভিতৰত সাংসদ নিৰ্বাচিত বিধায়কসকলৰ বিধায়ক পদ খাৰিজ হয়।

বিজেপিয়ে এইবাৰ তেওঁলোকৰ ৪জন বিধায়কক সাংসদ প্ৰাৰ্থী হিচাপে নিৰ্বাচনত নমাইছিল আৰু তাৰে ৩জনেই জয়ী হয়।

অৱশ্যে বিধায়ক তিনিজনে ভোট দিব নোৱাৰিলেও কোনো অসুবিধাত নপৰে বিজেপি আৰু মিত্ৰদল। তেওঁলোকৰ দুয়োজন প্ৰাৰ্থীকে জয়ী কৰাবৰ বাবে তাৰ পিছতো যথেষ্ট সংখ্যক বিধায়ক হাতত থাকিব। মিত্ৰজোঁটৰ বৰ্তমান ৮৭ (সাংসদ নিৰ্বাচিত তিনিজনক ধৰি) বিধায়ক আছে। দুয়োজন প্ৰাৰ্থীক জয়ী কৰাবলৈ তেওঁলোকক ৮৪জন (৪২ + ৪২ ) বিধায়কহে দৰকাৰ।

তাতকৈও ডাঙৰ কথা, এই ক্ষেত্ৰত শাসনাধিষ্ঠিত দলৰ প্ৰাৰ্থীকেইজন ভোটিং প্ৰক্ৰিয়াৰ মাজেৰে নোযোৱাকৈয়ে নিৰ্বাচিত হ’ব পাৰে। কাৰণ, বিৰোধী কংগ্ৰেছ আৰু এ আই য়ু ডি এফে প্ৰাৰ্থীয়েই দিয়া নাই।

ইতিপূৰ্বে বিজেপিৰ পৰা কামাখ্য প্ৰসাদ তাছা আৰু অগপৰ পৰা বীৰেন্দ্ৰ প্ৰসাদ বৈশ্যই আসন দুখনৰ বাবে ২৮ মে’ত মনোনয়ন পত্ৰ দাখিল কৰিছে। প্ৰাক্তন প্ৰধান মন্ত্ৰী ড০ মনমোহন সিং আৰু শান্তিয়াছ কুজুৰৰ কাৰ্য্যকাল অন্ত পৰিব বাবে দুয়োখন আসন অহা ১৪ জুনত খালী হ’ব।

ইপিনে ভোট দিব নোৱাৰিব কংগ্ৰেছৰ জনিয়াৰ বিধায়ক তথা সপ্তদশ লোকসভালৈ সাংসদ নিৰ্বাচিত আব্দুল খালেকেও। অৱশ্যে ভোটদানৰ বাবে কংগ্ৰেছৰ প্ৰাৰ্থীও নাই।