নামতি বিদ্যুৎ উপ-কেন্দ্ৰৰ গাফিলতিৰ বাবে বিদ্যুৎস্পৃষ্ট হৈ মৃত্যুৰ সৈতে যুঁজিছে এগৰাকী কৰ্মচাৰীয়ে

শিৱসাগৰ জিলাৰ নামতি বিদ্যুৎ উপ কেন্দ্ৰৰ কৰ্মচাৰীৰ গাফিলতিৰ বাবে আজি দুপৰীয়া বিভাগটোৰ এজন অস্থায়ী কৰ্মচাৰী বিদ্যুৎস্পৃ্ষ্ট হৈ গুৰুত্বৰভাৱে আঘাতপ্ৰাপ্ত হ’বলগীয়া হয়।  আঘাতপ্ৰাপ্ত যুৱকজনৰ নাম দিগন্ত বৰা বুলি জানিব পৰা গৈছে। তেওঁ বহুদিন ধৰি নামতি বিদ্যুৎ উপ কেন্দ্ৰত অস্থায়ী কৰ্মচাৰী হিচাপে কৰ্মৰত আছিল।

ঘটনাৰ বিৱৰণী মতে, নামতি ষ্টেশ্যনৰ সমীপৰ নামতি আলিৰ কাষত বৈদ্যুতিক খুটাত উঠি মেৰামতিৰ কাম কৰি থকা অৱস্থাত হঠাৎ বিদ্যুতৰ সংযোগ দিয়াৰ ফলত বিদ্যুস্পৃ্ষ্ট হৈ প্ৰায় ১২ ফুট উচ্চতাৰ খুটাৰ পৰা ওফৰি পকী পথত পৰাৰ ফলত মুৰৰ পিছ অংশ ফাটি গুৰুত্বৰ ভাৱে আঘাতপ্ৰাপ্ত হয়।

গুৰুতৰভাৱে আঘাতপ্ৰাপ্ত দিগন্ত বৰাক লগে লগে শিৱসাগৰৰ প্ৰগতি নাৰ্চিং হোমত ভৰ্তি কৰোৱা হয়।

ঘটনাটো সংঘটিত হোৱাৰ পাছতে স্থানীয় লোকে নামতি বিদ্যুৎ উপ কেন্দ্ৰত হুলস্থলীয়া পৰিবেশৰ সৃষ্টি কৰে। ৰাইজৰ অভিযোগ অনুসৰি কেন্দ্ৰটোৰ কৰ্মচাৰীসকলৰ গাফিলতিৰ বাবেই এই ঘটনা সংঘটিত হ’বলৈ পালে।

উল্লেখযোগ্য যে, বিদ্যুতৰ তাৰ পৰিবাহী খুটাত উঠাৰ আগতে দিগন্তই ফোন যোগে কেন্দ্ৰটোৰ কৰ্মচাৰীক অৱগত কৰিছিল যদিও কি কাৰণত বিদ্যুৎ সংযোগ কৰি দিয়া হল তাক লৈ ৰহস্যৰ সৃষ্টি হৈছে।

আনহাতে, নামতি অঞ্চলৰ বিদ্যুৎ বিভাগৰ স্থায়ী লাইনমেন হিচাপে নিয়োজিত আব্দুল নামৰ কৰ্মচাৰীজনে দীৰ্ঘদিন ধৰি কোনোধৰণৰ কাম নকৰাৰ অভিযোগ উত্থাপন কৰিছে স্থানীয় ৰাইজে। আব্দুল নামৰ লাইনমেন জনে মেৰামতিৰ কামসমুহ অস্থায়ী কৰ্মচাৰীৰ দ্বাৰা কৰি নিজে কৰ্তব্যত গাফিলতি কৰি বুলি উল্লেখ কৰি স্থানীয় ৰাইজে শীঘ্ৰে ঘটনাৰ উচিত তদন্তৰ দাবী জনায়।