আবকাৰী বিভাগৰ ৩৬ ঘন্টা জোৰা অভিযান : অৰুণাচলৰ পৰা অনা তিনি ট্ৰাক সুৰা জব্দ

বোকাখাতৰ আবকাৰী বিভাগে গোলাঘাট সদৰ আবকাৰী বিভাগৰ সহযোগত মহকুমাটোৰ নুমলীগড়ৰ ধনশিৰি দলঙৰ সমীপত বৃহস্পতিবাৰে বিলাতী সুৰা ভৰ্তি তিনিখন ট্ৰাক জব্দ কৰে ৷

গোপন সুত্ৰৰ আধাৰত চলোৱা এই অভিযানৰ নেতৃত্ব দিছিল আবকাৰী বিভাগৰ বোকাখাতৰ বিষয়া শান্তনু হাজৰিকা, উপ পৰিদৰ্শৰ নিৰঞ্জন দাস আৰু নৱনীত আগৰৱালাই ৷

অৰুণাচলৰ নাহৰলাগুনৰ পৰা টিজুলৈ নি থকা অৱস্থাত এই সুৰাৰ গাড়ী তিনিখন জব্দ কৰে আবকাৰী বিভাগে ৷ পথ নিৰ্দেশনা অমান্য কৰাৰ অপৰাধতে গাড়ী তিনিখন জব্দ কৰা বুলি জনাইছে বোকাখাতৰ আৱকাৰী বিভাগে।

সুৰা কঢ়িওৱা গাড়ী তিনিখনে নাহৰলাগুনৰ পৰা বগীবিলহৈ টিজুলৈ যাবলৈ অনুজ্ঞা পত্ৰ লাভ কৰিছিল যদিও গাড়ী তিনিখনে এই পথ নিৰ্দেশনা অমান্য কৰি তেজপুৰ হৈ ৩৭ নং ৰাষ্ট্ৰীয় পথেদি সুৰা কঢ়িওৱাৰ বাবেই আবকাৰী বিভাগে জব্দ কৰে৷

এক গোপন সুত্ৰৰ আধাৰতেই বিগত ৩৬ ঘন্টাৰ অভিযানৰ শেষত অভিযানকাৰী দলে বৃহস্পতিবাৰে সন্ধিয়া নুমলীগড়ত সুৰা ভৰ্তি গাড়ী তিনিখন জব্দ কৰে।

গাড়ী তিনিখনত প্ৰায় ৩৬০০ কেচ বিদেশী সুৰা আছিল ৷ ইয়াৰ বজাৰ মুল্য প্ৰায় ৪৫ লাখ টকা হ’ব বুলি আবকাৰী বিভাগৰ সুত্ৰই প্ৰকাশ কৰিছে ৷

ঘটনা সম্পৰ্কত বোকাখাতৰ আবকাৰী বিভাগে এটা গোচৰ ৰুজু কৰি জব্দ কৰা সুৰা খিনি ৫ জুলাইত বোকাখাতৰ আদালতত দাখিল কৰিব বুলি জনাইছে ৷