ৰাজ্যসভাৰ সাংসদ মেৰীকমৰ আশা নতুন বাজেটে আন্তঃৰাষ্ট্ৰীয় প্ৰতিযোগিতাসমূহত ভাৰতৰ পদকৰ সংখ্যা বৃদ্ধি কৰিব

আজি বিত্তীয় মন্ত্ৰী নিৰ্মলা সীতাৰমনে দাখিল কৰা ‘কেন্দ্ৰীয় বাজেট-২০১৯’ সন্দৰ্ভত নিজৰ মত প্ৰকাশ কৰি কেন্দ্ৰ চৰকাৰে যিবোৰ কাম কৰি আছে উত্তৰ-পূবৰ ভালৰ বাবে কৰি আছে বুলি মন্তব্য কৰে ভাৰতৰ তাৰকা বক্সাৰ তথা ৰাজ্যসভাৰ সাংসদ এম চি মেৰীকমে।

মেৰীকমে সীতাৰমনে দাখিল কৰা বাজেটত কেন্দ্ৰ চৰকাৰে খেলক অগ্ৰাধিকৰা দিয়া বুলি উল্লেখ কৰি কয় যে খেলৰ প্ৰতি কেন্দ্ৰীয় চৰকাৰে দেখুৱা সদিচ্ছাৰ বাবে দেশত খেলৰ অনুকূলে সুস্থ বাতাবৰণ গঢ়লৈ উঠিব।

মেৰীকমে দেশৰ ক্ৰীড়াৰ আন্তঃগাঠনি উন্নয়নৰ ক্ষেত্ৰত কোনোধৰণৰ আপোচ কৰিব নালাগে বুলি উল্লেখ কৰি উন্নত ক্ৰীড়া আন্তঃগাঠনিয়ে দেশৰ নতুন প্ৰজন্মক খেলৰ প্ৰতি উৎসাহী কৰি তুলিব বুলি কয়।

আনহাতে, চৰকাৰে খেল বাজেট বৃদ্ধি কৰাৰ প্ৰসংগতো মন্তব্য কৰি তাৰকা বক্সাৰগৰাকীয়ে এনেধৰণৰ পদক্ষেপে আন্তঃৰাষ্ট্ৰীয় প্ৰতিযোগিতাসমূহ আৰু অলিম্পিকত ভাৰতৰ পদকৰ সংখ্যা বৃদ্ধি কৰিব বুলি আশা ব্যক্ত কৰে।

তদুপৰি, মেৰীকমে দেশৰ বিভিন্ন খেলৰ ফেডাৰেশ্যনসমূহক ঐক্যবদ্ধ হৈ কাম কৰি ভাৰতৰ ক্ৰীড়াক্ষেত্ৰক আগবঢ়াই নিয়াৰ বাবে গুৰুত্বপূৰ্ণ ভূমিকা পালন কৰিব লাগিব বুলিও তাৎপৰ্য্যপূৰ্ণ মন্তব্য কৰে।

উল্লেখযোগ্য যে, প্ৰথমবাৰৰ বাবে ভাৰতৰ ইতিহাসত এগৰাকী মহিলা মন্ত্ৰীয়ে সংসদত বাজেট দাখিল কৰি থকাৰ সময়ত মেৰীকমে সংদনত উপস্থিত থাকিবলৈ পাই উৎসাহী হৈ পৰে বুলিও সংবাদ মাধ্যমৰ আগত মত প্ৰকাশ কৰে।