১৯ আৰু ২০ জুলাইত কাজিৰঙা অৰ্কিড উদ্যানত ন ভূঁই উৎসৱ

অহা ১৯ আৰু ২০ জুলাইত দুদিনীয়া কাৰ্যসূচীৰে কাজিৰঙা অৰ্কিড আৰু জৈৱ বৈচিত্ৰ উদ্যানত অনুষ্ঠিত হ’ব ন ভূঁই উৎসৱ। দ্বিতীয় বাৰৰ বাবে অনুষ্ঠিত হ’ব এই ন ভূঁই উৎসৱ। বুধবাৰে কৃষক মুক্তি সংগ্ৰাম সমিতিৰ গান্ধীবস্তিস্থিত মুখ্য কার্যালয়ত সংবাদমেল সম্বোধন কৰি এই কথা জানিবলৈ দিয়ে কৃষক নেতা অখিল গগৈয়ে।

তেওঁ সংবাদমেলত এই ন ভূঁই উৎসৱ সকলোৰে বাবে মুকলি থাকিব বুলিও কয়। লগতে সকলো নাগৰিক, ছাত্ৰ-ছাত্ৰী অভিভাৱক , শিক্ষক সকলোৱে আহি যোগদান কৰিব পাৰিব। বিনামূলীয়া কৈ পৰম্পৰাগত ৰীতি-নীতি ভূঁই ৰোৱা, হাল বোৱা, পথাৰত আলি দিয়া, মৈ দিয়া, চুক ৰোৱা, জলপান দিয়া আদিৰ অভিজ্ঞতাৰ সংগী হ’ব পাৰিব সকলো।

এই উৎসৱত যোগদান কৰিব খোজা সকলে ১৮ আৰু ১৯ জুলাইত নাম ভৰ্তি কৰিব পাৰিব বুলিও গগৈয়ে কয়।

ইয়াৰ উপৰি উক্ত উৎসৱত পৰম্পৰাগত ৰীতি-নীতিৰে কেনেকৈ ন ভূঁই ৰোৱা হয় তাক প্ৰদৰ্শন কৰা হ’ব বুলি তেওঁ জানিবলৈ দি লগতে কয় ” অংশগ্ৰহণকাৰী সকলে মুকলি মুৰীয়াকৈ বোকাত বিমল আনন্দ ফুৰ্তি কৰাৰ সুযোগ লাভ কৰাৰ লগতে উদ্যানৰ কাষতে থকা কাৰ্বি আংলঙৰ পৰা নামি অহা জুৰিত গা ধোৱাৰ সুযোগ লাভ কৰিব।”

অৱশ্যে দুয়োটা দিনৰ বাবে ৰাতিপুৱাৰ জলপান বিনামূলীয়া হ’ব যদিও দুপৰীয়াৰ ভাত সাঁজৰ মূল্য দিব লাগিব অংশগ্ৰহণকাৰীয়ে এই কথা সংবাদমেলত উল্লেখ কৰি গগৈয়ে কয় দুপৰীয়াৰ ভাত সাজত অন্ততঃ ২০ প্ৰকাৰৰ অসমীয়া পৰম্পৰাগত ব্যঞ্জন থাকিব। তাৰ ভিতৰত কোমোৰা সৈতে পাতি হাঁহৰ মাংস, কঁঠাল গুটিৰ সৈতে কচুৰ ডাইল, নল টেঙাৰ লগত মাছৰ জোল, কণ বিলাহীৰ সৈতে হাঁহৰ কণী আঞ্জা, বেত গাজৰ আঞ্জা ইত্যাদি।

আনহাতে উক্ত সংবাদমেলত অখিল গগৈ কেৱল আন্দোলনকাৰী বুলি চ’ছিয়েল মিডিয়াত সমালোচনা কৰা সমালোচকক প্ৰত্যুত্তৰ দি কয় ” মই কেৱল আন্দোলনকাৰীয়েই নহয় মই হাল বাবও জানো আলি দিবও জানো। খেতিৰ সকলো কামেই জানো।”