দিচাংমুখৰ বিস্তীৰ্ণ অঞ্চল বানৰ কবলত; বিপদ সীমাৰ ওপৰেদি বৈছে ব্ৰহ্মপুত্ৰ

আজি বহুকেইদিন হৈ থকা নেৰানেপেৰা বৰষুণৰ ফলত শিৱসাগৰৰ দিচাংমুখ অঞ্চলৰ বহুকেইখন গাঁও ব্ৰহ্মপুত্ৰ আৰু দিচাং নদীৰ বাঢ়নী পানীত বুৰ গৈ আছে।

অঞ্চলটোৰ অফলা, চৰাইপৰা, মামল, গড়ভঙা, সৰাগুৰি চাপৰি, লিগিৰিবাৰী, আলিচিগা, বলমা, জোলাটোপ, দীঘলদৰিয়লী,  ডিমৌমুখ আদি গাওঁ বৰ্তমান পানীৰ তলত। নৈ পৰীয়া মানুহৰ  ঘৰ বাৰীৰ লগতে শ শ বিঘা খেতি পথাৰ পানীত বুৰ যোৱাত এক হাহাকাৰ অৱস্থাৰ সৃষ্টি হৈছে। অঞ্চল সমূহত মানুহৰ লগতে জীৱ জন্তুসমূহেও মথাউৰিৰ ওপৰত আশ্ৰয় গ্ৰহণ কৰিব লগীয়া হৈছে।

সৰাগুৰি প্ৰাথমিক বিদ্যালল, ৰৌমাৰী প্ৰাথমিক বিদ্যালয়, নামনি মামল গড়ভগা প্ৰথমিক বিদ্যালয়, অফলা গড়ভঙ্গা প্ৰাথমিক বিদ্যালয়কে ধৰি কেইবাখনো বিদ্যালয় প্ৰলয়ংকাৰী বনৰ কবলত পৰিছে।

প্ৰাপ্ত তথ্য অনুসৰি বৰ্তমানলৈকে অফলা গাঁৱত ১২০ ঘৰ, গড়ভগা গাঁৱত ৮৫ ঘৰ, আলিচিগা গাঁৱত ৩৪২ ঘৰ, বলমা কৈৱৰ্ত গাঁৱত ৫০ ঘৰ, লিগিৰিবাৰী গাঁৱত ১৪০ ঘৰ, বলমা মিচিং গাঁৱত ১৮২ ঘৰ আৰু মামল গাঁৱত ১১২ ঘৰ ব্ৰহ্মপুত্ৰ আৰু দিচাং নদীৰ বাঢ়নী পানীত ক্ষতিগ্ৰস্ত হৈছে।

১৪ জুলাইলৈকে দিচাংমুখত ব্ৰহ্মপুত্ৰ নদী বিপদ সীমাৰ ২ মিটাৰ ওপৰেদি বৈ থকাৰ কথা জনসম্পদ বিভাগৰ সূত্ৰৰ পৰা জানিব পৰা গৈছে। এইদৰে ব্ৰহ্মপুত্ৰ আৰু দিচাং নদীৰ জলপৃষ্ঠ বৃদ্ধি পাই থাকিলে অনগাত দিনত আৰু ন ন গাঁও প্লাবিত হোৱাৰ সম্ভৱনা আছে।