বহিৰ্ভূতৰ নাগৰিকত্ব: চূড়ান্ত এন আৰ চিৰ মাত্ৰ ১৪ দিন পূৰ্বে নতুন নিৰ্দেশ চৰকাৰক

চূড়ান্ত এন আৰ চি প্ৰকাশলৈ মাজত মাত্ৰ দুটা সপ্তাহ বাকী থকা অৱস্থাত পঞ্জীত নাম অন্তৰ্ভুক্ত নোহোৱাসকলৰ নাগৰিকত্ব দাবী সন্দৰ্ভত সোমবাৰে কেন্দ্ৰ আৰু অসম চৰকাৰক এক গুৰুত্বপূৰ্ণ নিৰ্দেশ দিছে ভাৰতৰ উচ্চতম ন্যায়ালয়ে।

এনে ব্যক্তিয়ে নাগৰিকত্ব দাবী কৰাৰ ক্ষেত্ৰত পাব লগা সময়সীমাক লৈ আদালতত শপতনামা দাখিল কৰিবলৈ উচ্চতম ন্যায়ালয়ে দুয়ো চৰকাৰকে নিৰ্দেশ দিছে।

শপতনামা দাখিলৰ বাবে দু্যোখন চৰকাৰকে চাৰি সপ্তাহৰ সময় দিয়া হৈছে। অৰ্থাৎ অহা ৩১ জুলাইত চূড়ান্ত এন আৰ চি প্ৰকাশৰ পিছতো এই শপতনামা দাখিলৰ সময় চৰকাৰে পাব।

আমছু আৰু মৌলানা চৈয়দ আৰ্ছাদ মাদানি নেতৃত্বাধীন জমিয়ত উলেমা ই হিন্দৰ লেখ আবেদনৰ শুনানি লৈ মুখ্য ন্যায়াধীশ ৰঞ্জন গগৈ আৰু ন্যায়াধীশ দীপক গুপ্তাৰ বিচাৰপীঠে এই নিৰ্দেশ দিয়ে।

গুচৰীয়া পক্ষৰ হৈ এইক্ষেত্ৰত আপত্তি দৰ্শাই জ্যেষ্ঠ অধিবক্তা কপিল চিবালে যুক্তি দৰ্শাই যে এগৰাকী লোকে যদি ৬০ দিনৰ ভিতৰত নিৰ্দেশৰ এক প্ৰত্যায়িত প্ৰতিলিপি নাপায়, তেন্তে তেওঁ আৰু নাগৰিকত্ব দাবীৰ আবেদন কৰিব নোৱাৰিব।

দ্বিতীয়তে, এই সময়তে তেওঁক গ্ৰেপ্তাৰ কৰাও হ’ব পাৰে, চিবালৰ যুক্তি।

এন আৰ চিত নাম নহা ব্যক্তিয়ে ৬০ দিনৰ ভিতৰত নিজৰ নাগৰিকত্ব দাবী কৰাৰ বিধান আছে।

কিন্তু সেই সময়সীমা চূড়ান্ত এন আৰ চি প্ৰকাশৰ দিনৰ পৰা নে ব্যক্তিগৰাকীয়ে নিৰ্দেশৰ প্ৰতিলিপি পোৱাৰ দিনাৰ পৰা সেয়া স্পষ্ট নহয়।

“এইক্ষেত্ৰত স্পষ্টতাৰ বাবে আবেদনখন দাখিল কৰা হৈছিল,” আমছুৰ উপদেষ্টা আজিজুৰ ৰহমানে কয়।

২০১৮ চনৰ ৩১ ডিচেম্বৰত এন আৰ চিৰ প্ৰকাশ পাইছিল চূড়ান্ত খচৰা আৰু ইয়াৰ পৰা নাম বাদ পৰিছিল ৪০,০৭,৭০৭ গৰাকী লোকৰ। ইয়াৰ বিপৰীতে ২,৮৯,৮৩,৬৭৭ গৰাকী লোকৰ নাম অন্তৰ্ভুক্ত হৈছিল চূড়ান্ত খচৰাত।