এসপ্তাহৰ বিৰতিৰ অন্তত আজি মুকলি মাজুলী-নিমাতীঘাট ফেৰী সেৱা

প্ৰবল বৰষুণৰ বাবে ব্ৰহ্মপুত্ৰৰ জলপৃষ্ঠ বিপদ সীমাৰ যথেষ্ট ওপৰেৰে বৈ থকাৰ বাবে মাজুলী আৰু নিমাতীঘাটৰ মাজত ফেৰী সেৱা সাময়িকভাৱে বন্ধ কৰি দিয়া হৈছিল।

আজি প্ৰায় এসপ্তাহৰ বিৰতিৰ পাছত মাজুলী আৰু নিমাতীঘাটৰ মাজত ফেৰী সেৱা পুনৰ মুকল কৰা হয়। ৰাতিপুৱা ৯ বজাত মাজুলীৰ পৰা নিমাতীঘাটলৈ যাত্ৰীৰে সৈতে ফেৰীখনে যাত্ৰা আৰম্ভ কৰে আৰু আবেলি ৩ বজাত ফেৰীখন পুনৰ উভতি আহিব।

আনহাতে, বৰ্তমান মাত্ৰ এখন ফেৰীহে চলাৰ বাবে  অনুমতি প্ৰদান কৰা হৈছে। ফেৰীখনক কেবল মাত্ৰ যাত্ৰী কঢ়িওৱাৰ বাবেহে অনুমতি দিয়া হৈছে। ব্ৰহ্মপুত্ৰৰ জলপৃষ্ঠ নিম্নগামী হ’লে পুনৰ বেছি সংখ্যক ফেৰী চলাচল কৰিবলৈ অনুমতি দিয়া হ’ব বুলি খবৰ লাভ কৰা হৈছে।

আভ্যন্তৰীণ জল পৰিবহণ বিভাগে মাজুলী আৰু নিমাতীঘাটৰ মাজত চলিব লগা ফেৰীখনত যান-বাহন কঢ়িওৱাত নিষেধাজ্ঞা আৰোপ কৰিছে।

উল্লেখযোগ্য যে, বানপানীৰ বাবে মাজুলী আৰু নিমাতীঘাটৰ মাজৰ ফেৰীসেৱা বন্ধ হৈ থকাৰ ফলত মাজুলীৰ জনসাধাৰণে যাতায়তৰ ক্ষেত্ৰত যথেষ্ট অসুবিধাৰ সন্মুখিন হ’বলগীয়া হৈছে।