জনবিৰোধী বাজেটৰ বিৰুদ্ধে নিখিল ভাৰত ট্ৰেড ইউনিয়ন কংগ্ৰেছৰ বিক্ষোভ প্ৰদৰ্শন

সংসদৰ বাজেট অধিৱেশনত বিত্ত মন্ত্ৰীয়ে উত্থাপন কৰা ২০১৯-২০ বৰ্ষৰ বাজেট খন সম্পূৰ্ণ জনবিৰোধী বাজেট বুলি অভিযোগ কৰি নিখিল ভাৰত ট্ৰেড য়ুনিয়ন কংগ্ৰেছ অসমে আজি দিনৰ প্ৰায় ১১ বজাৰ পৰা লক্ষ্মীনাথ বেজবৰুৱা চকত এক বিক্ষোভ কাৰ্যসূচী গ্ৰহণ কৰে।

সন্থাটোৱে অভিযোগ উত্থাপন কৰি কয় যে এই বাজেটখন সম্পূৰ্ণ ক’ৰ্পৰেট গোষ্ঠীৰ স্বাৰ্থজড়িত, লগতে এই বাজেটখনে ৰে’লৱে, প্ৰতিৰক্ষা আৰু আন আন ৰাজহুৱা খণ্ডৰ ব্যক্তিগত কৰণৰ কথা উল্লেখ আছে বুলিও অভিযোগ কৰে।

লগতে বাজেট খনে ৪৪ খন শ্ৰম আইন ৪ খন কোডত ৰূপান্তৰিত কৰি দেশৰ শ্ৰমিকসকলক তেওঁলোকৰ অধিকাৰ আৰু সা- সুবিধাৰ পৰা বঞ্চিত কৰিছে বুলি অভিযোগ উত্থাপন কৰে।

আৰু কয় যে নিৰ্বাচনৰ আগত ৫ খন নতুন দলং ব্ৰক্ষ্মপুত্রৰ বুকুত স্থাপন হ’ব বুলি ঘোষণা কৰিছিল যদিও বাজেটত কোনো ধৰণৰ ইয়াৰ প্ৰতিফলন দেখিব পোৱা নগ’ল। অসমৰ নগাওঁ আৰু কাছাৰৰ কাগজকলৰ পুনৰুজীৱিত কৰাৰ কোনো পন্থা হাতত নল’লে এই বাজেটখনে।

লগতে কেন্দ্ৰ চৰকাৰৰ এই জনবিৰোধী নীতিৰ বিৰুদ্ধে ১৫জুলাইৰ পৰা আজি অৰ্থাৎ ১৭ জুলাইলৈকে সকলো জিলা সমিতিয়ে বিক্ষোভ কাৰ্যসূচী গ্ৰহণ কৰিছে বুলি ৰাজ্যিক সম্পাদক ৰমেন দাসে এক প্ৰেছ বিবৃতিৰ জৰিয়তে জানিবলৈ দিয়ে।