ৰাজ্যৰ বান পৰিস্থিতি পৰ্যালোচনা হিমন্ত বিশ্ব শৰ্মাৰ; ক’লে মুঠ ৩০ টা মথাউৰি ক্ষতিগ্ৰস্ত হৈছে

অসমৰ বিত্তমন্ত্ৰী হিমন্ত বিশ্ব শৰ্মাই বুধবাৰে অসমৰ বান পৰিস্থিতি সন্দৰ্ভত পৰ্যালোচনা কৰে। পৰ্যালোচনা কালত শৰ্মাই বানপানীৰ সময়ত অসমৰ মুঠ ৩০ টা মথাউৰি ভঙা বুলি উল্লেখ কৰে।

অসমৰ ৩৩ খন জিলাৰ ভিতৰত ৩০ খন জিলাক চলিত বানপানীয়ে আক্ৰান্ত কৰিছে।

দুৰ্যোগ প্ৰশমন বিভাগ অসমে মুকলি কৰা সেহতীয়া বানপানীৰ তথ্য অনুসৰি বৰ্তমানেও ২০ খন জিলা বানপানীৰ তলত আছে।

তথ্যত উল্লেখ কৰা অনুসৰি বানপানীয়ে ২,৯৩৩ খন গাঁৱৰ প্ৰায় ৩৪.৮২ লাখতকৈও অধিক লোকক আক্ৰান্ত কৰিছে।

লাখতকৈ অধিক লোক বানপানীৰ ফলত গৃহহাৰ হৈছে আৰু বৰ্তমানেও বহু লোক আশ্ৰয় শিৱিৰত আশ্ৰয় গ্ৰহণ কৰি আছে।

শৰ্মাই এই বৰ্ষৰ পৰা ভঙা মথাউৰি সমূহ পুনৰ নিৰ্মাণ কৰা নহয় বুলি বৈঠকৰ অন্তত সংবাদ মাধ্যমৰ আগত উল্লেখ কৰে।

তাৰ বিপৰীতে তেওঁ সম্পূৰ্ণ মথাউৰিটো নতুনকৈ নিৰ্মাণ কৰাৰ বিষয়ে মত প্ৰকাশ কৰে যাতে পুনৰ মথাউৰিটো নিছিঙে।

তেওঁ বৰ্তমানলৈ বান আক্ৰান্ত নখন জিলা পৰিদৰ্শন কৰা বুলি কোৱাৰ লগতে আগন্তুক দিনত আৰু দহখন বান আক্ৰান্ত জিলা পৰিদৰ্শন কৰিব বুলি মত ব্যক্ত কৰে।

বিত্তমন্ত্ৰীগৰাকীয়ে বানপানীৰ বাবে ৰাজ্যৰ জনস্বাস্থ্য বিভাগে যথেষ্ট ক্ষতিৰ সন্মুখিন হ’বলগীয়া হৈছে বুলি উল্লেখ কৰি এই ক্ষতিৰ পৰিমান প্ৰায় ৩৫০ কোটিৰো অধিক হ’ব বুলি কয়।

বানপানীত আক্ৰান্ত হোৱা জনসাধাৰণৰ সহায়ৰ বাবে বিভিন্ন বিভাগে সহযোগিতাৰে ১০০০ কোটি টকা সংগ্ৰহ কৰে।

উল্লেখযোগ্য যে, অসমত ১৯৫০ চনৰ পাছৰে পৰা নিৰ্মাণ কৰা মুঠ ৫০০০ কিলোমিটাৰ মথাউৰি আছে আৰু ইয়াৰ বেছিভাগ মথাউৰিৰে সময়মতে পুনৰ নিৰ্মাণ নকৰাৰ বাবে জীৱন কাল শেষ হৈছে।