ডি পি এছৰ শিক্ষয়িত্ৰীৰ আত্মহত্যা : আৰক্ষীয়ে অনুসন্ধানৰ বাবে নিজৰ হাতলৈ নিলে ম’বাইল, লেপটপ

ডিগবৈ দিল্লী পাব্লিক স্কুলৰ পদাৰ্থবিজ্ঞানৰ শিক্ষয়িত্ৰী মাধুৰিমা গগৈৰ আত্মহত্যাৰ ঘটনাৰ এতিয়াও একো মোৰ পোৱা নাই আৰক্ষীয়ে। এটা সূত্ৰই জনোৱা মতে আৰক্ষীয়ে শিক্ষয়িত্ৰীগৰাকীৰ কোৱাৰ্টাৰত (108 B -II) প্ৰাথমিক অনুসন্ধান কৰাৰ পিছত ম’বাইল আৰু লেপটপ নিজৰ জিম্মাত লৈছে। ম’বাইল কল ডিটেইল আৰু লেপটপৰ তথ্যই শিক্ষয়িত্ৰীগৰাকীৰ শেহতীয়া সংযোগবোৰ আৰু মানসিক স্থিতি সম্পৰ্কে কিছু অনুমানৰ ভিত্তি দিব পাৰে বুলি আৰক্ষীয়ে এইবোৰ নিজৰ জিম্মাত লৈছে।

আনহাতে আজি পুৱাই আৰক্ষীয়ে মৃতদেহটো মৰণোত্তৰ পৰীক্ষাৰ বাবে তিনিচুকীয়া অসামৰিক চিকিৎসালয়লৈ নিয়ে। মৰণোত্তৰ পৰীক্ষাৰ পাছত মৃতদেহ পৰিয়ালৰ লোকে গুৱাহাটীৰ জু তিনি আলিৰ ঘৰলৈ নি গুৱাহাটীতে মৃতদেহটো সৎকাৰ কৰাৰ কথা। শিক্ষয়িত্ৰীগৰাকীৰ স্বামী তথা বৰ্তমান শিৱসাগৰত কৰ্মৰত সহকাৰী কৰ আয়ুক্ত প্ৰদীপ গগৈ কালিয়ে ডিগবৈত আহি উপস্থিত হৈছেহি। আনহাতে দিল্লীত অধ্যয়নৰত তেওঁলোকৰ পুত্ৰ তাৰ পৰা আহি আছে বুলি জানিব পৰা গৈছে।

উল্লেখযোগ্য যে কালি ডিগবৈ দিল্লী পাব্লিক স্কুলৰ শিক্ষয়িত্ৰী মাধুৰিমা গগৈৰ (৪৮) আত্মহত্যাই তৈল নগৰীখনৰ লগতে অঞ্চলটোত চাঞ্চল্যৰ সৃষ্টি কৰিছিল। তেওঁক তেওঁৰ কোৱাৰ্টাৰৰ শোৱনি কোঠাত ওলমি থকা অৱস্থাত উদ্ধাৰ কৰা হৈছিল। দক্ষ শিক্ষয়িত্ৰী গৰাকীয়ে কিয় আত্মহত্যা কৰিলে সেই লৈ এতিয়াও সকলো পক্ষ মোৰ নোহোৱা অৱস্থাত আছে।

আনহাতে এটা সূত্ৰই দাবী কৰিছে যে ডিগবৈ দিল্লী পাব্লিক স্কুলৰ বৰ্তমানৰ অৱস্থা অতি বেয়া পৰিস্থিতিৰ মাজেৰে গতি কৰিছে। ইয়াক লৈ বহুতো শিক্ষক-শিক্ষয়িত্ৰী তথা অভিভাৱকসকলৰ মাজত তীব্ৰ অসন্তুষ্টিয়ে বিৰাজ কৰিছে। মেনেজমেণ্টে এক প্ৰকাৰৰ স্বৈৰাচাৰী মনোভাবেৰে কাম কৰি আহিছে বুলিও সূত্ৰটোৱে দাবী কৰিছে। কিছু মাহৰ পূৰ্বে ডিগবৈ দিল্লী পাব্লিক স্কুলৰ মেনেজমেণ্টে তদানীন্তন অধ্যক্ষক বিভিন্ন হাৰাশাস্তি কৰি (কোৱাৰ্টাৰৰ বিজুলী সংযোগ কটাকে ধৰি) স্কুলখন ত্যাগ কৰিবলৈ বাধ্য কৰিছিল বুলি তথ্য পোৱা গৈছে।

বিদ্যালয়খনৰ এনে পৰিস্থিতিয়ে শিক্ষক-শিক্ষয়িত্ৰীসকলৰ মাজত এক হতাশাৰ সৃষ্টি কৰিলেও কেৱল সেই কাৰণতেই এগৰাকী দক্ষ শিক্ষয়িত্ৰীয়ে আত্মহত্যা কৰাটো বিশ্বাসযোগ্য নহয়। কিন্তু আন কোনো সহজ অনুমেয় কাৰণো দেখা পোৱা নাযায়। তেনেস্থলত শিক্ষয়িত্ৰী গৰাকীৰ আত্মহত্যাৰ ঘটনাই সংশ্লিষ্ট সকলো পক্ষকে ৰহস্যত ৰাখিছে।