প্ৰাদেশীকৰণৰ দাবীৰে দিচপুৰ লাষ্টগেটত অৱস্থান ধর্মঘট অসম শিক্ষক কৰ্মচাৰী ঐক্যমঞ্চৰ

অসম শিক্ষক কৰ্মচাৰী ঐক্যমঞ্চই ভেঞ্চাৰ শিক্ষানুষ্ঠানসমূহ প্ৰাদেশীকৰণৰ দাবীৰে সোমবাৰে দিচপুৰ লাষ্টগেটত অৱস্হান ধৰ্মঘট কাৰ্যসূচী ৰূপায়ন কৰে।

ৰাজ্যৰ প্ৰায় ৪৮ হাজাৰ গৰাকী শিক্ষক কৰ্মচাৰীৰ পদ প্ৰাদেশীকৰণৰ দাবীৰে সোমবাৰে অসম শিক্ষক কৰ্মচাৰী ঐক্যমঞ্চই দিচপুৰ লাষ্টগেটত তীব্ৰ প্ৰতিবাদ সাব্যস্ত কৰে।

উল্লেখযোগ্য যে, বৰ্তমান ৰাজ্যৰ ৮,০০০ খন ভেঞ্চাৰ শিক্ষানুষ্ঠানত কৰ্মৰত প্ৰায় ৪৮ হাজাৰগৰাকী শিক্ষক-কৰ্মচাৰী চৰকাৰৰ অনীহাৰ বাবে বিনা বেতনে কাম কৰি থাকিবলগীয়া হৈছে।

শিক্ষক কৰ্মচাৰী ঐক্যমঞ্চৰ সভাপতি কুশল কুমাৰ হালৈয়ে ভেঞ্চাৰ বিদ্যালয়সমূহ প্ৰাদেশীকৰণৰ স্বাৰ্থত শিক্ষক কৰ্মচাৰী ঐক্যমঞ্চ গঠন কৰা হৈছিল বুলি উল্লেখ কৰি কয় যে এতিয়াও ৰাজ্যত হাজাৰ হাজাৰ শিক্ষকে বিনাবেতনে শিক্ষাদান কৰি থাকিবলগীয়া হোৱাটো দুখৰ কথা।

ইখনৰ পাছত সিখন আইন বলবৎ হোৱাৰ পাছতো বৰ্তমান ৪০ হাজাৰ শিক্ষকেহে চাকৰি লাভ কৰিবলৈ সক্ষম হৈছে আনহাতে প্ৰতিবাৰেই অপ্ৰাদেশীকৃত বিদ্যালয়ৰ শিক্ষকসকল উপক্ষিত হৈ আহিছে বুলিও হালৈয়ে ক্ষোভ ব্যক্ত কৰে।

তেওঁ অসম চৰকাৰৰ মুখ্য মন্ত্ৰীক বিষয়টো গুৰুত্বসহকাৰে গ্ৰহণ কৰি শীঘ্ৰে বিষয়টো সমাধান কৰাৰ বাবে  আহ্বান জনায়।

আনহাতে, আজিৰ প্ৰতিবাদত সদৌ অসম সংগ্ৰামী মঞ্চৰ কাৰ্যকৰী সভাপতি অদীপ কুমাৰ ফুকনে ভাগ লৈ চৰকাৰে কৰা বঞ্চনাৰ বিৰুদ্ধে জাঙুৰ খাই উঠে।

মানৱ সম্পদ গঢ় দিয়া শিক্ষক সমাজ আজি উপেক্ষিত হৈছে আৰু তেওঁলোকে নিজৰ প্ৰাপ্য অধিকাৰৰ বাবে ওলাই আহিব লগা হৈছে, গতিকে ইয়াতকৈ আৰু দুখৰ বিষয় কি হ’ব পাৰে বুলি দুখ প্ৰকাশ কৰে ফুকনে।

স্বাধীনতাৰ ৭০ বছৰৰ পাছতো যদি শিক্ষকসকলে এনে অৱস্থাৰ সন্মুখিন হ’ব লগা হৈছে আৰু চৰকাৰে শিক্ষকসকল দাবীসমূহ পূৰণ কৰিব পৰা নাই তেনেহ’লে আমাক এনে এখন চৰকাৰ নালাগে বুলিও ফুকনে তাৎপৰ্য্যপূৰ্ণ মন্তব্য কৰে।