আলফাৰ ৰাজনৈতিক দল খোলাৰ পৰিকল্পনাত আউল; মিথিংগা দৈমাৰীৰ বিৰোধ

২৭ জুলাইৰ চহিদ দিৱসৰ কাৰ্য্যসূচীত আলফাৰ সাধাৰণ সম্পাদক অনুপ চেতিয়াই আলফাৰ দ্বাৰা এটা নতুন ৰাজনৈতিক দল গঠনৰ কুচকাৱাজৰ ইংগিত দিছিল যদিও, আৰম্ভণিতেই ইয়াক লৈ মতানৈক্য সৃষ্টি হৈছে।

জানিব পৰা গৈছে যে আলফাৰ কেন্দ্ৰীয় প্ৰচাৰ সম্পাদক মিথিংগা দৈমাৰীয়ে এই কথাটোৰ তীব্ৰ বিৰোধিতা কৰিছে।

“কোনো কাৰণতে আমি আলফাৰ মঞ্চক ৰাজনীতিৰ বাবে ব্যৱহাৰ কৰিবলৈ নিদিওঁ। আমি মুকলিভাবে জনাওঁ এই দল কেতিয়াও খুলিবলৈ দিয়া নহ’ব”, প্ৰথমটো প্ৰতিক্ৰিয়া মিথিংগা দৈমাৰীৰ।

অনুপ চেতিয়াই অৱশ্যে ৰাজনৈতিক দল খোলাৰ চিন্তাটো “ব্যক্তিগত” পৰ্য্যায়ত আছে বুলি জানিবলৈ দিছিল।

অনুপ চেতিয়াই ৰাজনৈতিক দল খোলাৰ পৰিকল্পনাৰ কথা ব্যক্ত কৰাৰ সময়ত উক্ত চহিদ দিৱসৰ কাৰ্য্যসূচীত উপস্থিত আছিল আলফাৰ প্ৰায়বোৰ শীৰ্ষ নেতা। দৰং জিলাৰ দিপিলাত এই কাৰ্য্যসূচীটো অনুষ্ঠিত হৈছিল।

“চহিদসকল, পংগুত্ব বৰণ কৰাসকল বা আলফাৰ সংগ্ৰামত ভুক্তভোগী জনগণক তেওঁলোকৰ প্ৰাপ্য দিবলৈ আমি চৰকাৰ গঠন কৰিব লাগিব আৰু তাৰ বাবে এটা ৰাজনৈতিক দল খোলাৰ প্ৰয়োজন বোধ কৰিছো”, এয়া আছিল অনুপ চেতিয়াৰ যুক্তি।

তেওঁ লগতে “চুক্তি” হৈ যোৱাৰ পিছতহে ৰাজনৈতিক দল গঠন কৰা হ’ব বুলি মন্তব্য কৰিছিল। সংগঠনটো বৰ্তমান চৰকাৰৰ সৈতে আলোচনাত আছে।

মন কৰিব লগীয়া যে ১৯৯১ চনৰ ২৭ জুলাইত দৰং জিলাৰ দিপিলাত অৰ্ধসামৰিক বাহিনীৰ গুলীত ৫জনকৈ নিৰীহ লোকৰ মৃত্যু হৈছিল। তেতিয়াৰে পৰাই আলফাই এই দিনটোত চহিদ দিৱস হিচাপে পালন কৰি আহিছে।