কৃষ্ণাইত অঘটন; নিশা আকাশৰ পৰা সৰিল বিশেষ সামগ্ৰী

গোৱালপাৰা জিলাৰ কৃষ্ণাইত মঙলবাৰে নিশা প্ৰচণ্ড শব্দ কৰি আকাশৰ পৰা এজন লোকৰ ঘৰৰ চোতালত বেলুন সদৃশ এক বিশেষ সামগ্ৰী সৰি পৰা ঘটনাই অঞ্চলটোত চাঞ্চল্যৰ সৃষ্টি কৰিছে।

কৃষ্ণাই আৰক্ষী থানাৰ অন্তৰ্গত জিৰাৰ হলিশ ৰাভাৰ চোতালত পৰা উক্ত সামগ্ৰীবিধ চাবৰ বাবে তেওঁৰ ঘৰত কালি নিশা গাঁওখনৰ অগণন লোক গোট খায়।

প্ৰাপ্ত তথ্য মতে নিশা ৰাভাৰ পৰিয়ালৰ সদস্যসকল চোতালত বহি থকা অৱস্থাত আকাশৰ পৰা প্ৰকাণ্ড শব্দ কৰি সৰি পৰা বেলুন সদৃশ সামগ্ৰীবিধৰ লগত এটা ইলেকট্ৰনিক যন্ত্ৰও লাগি আছিল।

খবৰ শুনি গাঁৱৰ মানুহেৰে তেওঁৰ চোতাল ভৰি পৰাৰ লগতে একাংশই আৰক্ষীক খবৰ দিয়াত নিশাই আৰক্ষীৰ লোক আহি সামগ্ৰীবিধ থানালৈ লৈ আনে।

আৰক্ষীক এই সম্পৰ্কে সোধাত বিশেষ একো জনাৱো নাই যদিও সামগ্ৰীটোৰ ভিতৰত বেটাৰী আদি পোৱা গৈছে বুলি উল্লেখ কৰে।