কোকৰাঝাৰত অসম সত্ৰ মহাসভাৰ ৫১তম দ্বি- বাৰ্ষিক পূৰ্ণাংগ অধিৱেশনৰ আজি অন্তিম দিন

কোকৰাঝাৰত অসম সত্ৰ মহাসভাৰ ৫১ সংখ্যক দ্বি-বাৰ্ষিক পূৰ্ণাঙ্গ কেন্দ্ৰীয় অধিৱেশনৰ আজি অন্তিম দিন। অন্তিম দিনা অনুষ্ঠিত মুকলি সভাত সত্ৰীয়া জীৱন চন্দ্ৰ মহন্ত স্মাৰক বঁটা বিজয়ী আকাংক্ষা কাশ্যপৰ সত্ৰীয়া নৃত্য প্ৰদৰ্শনে আপ্লুত কৰিবলৈ সক্ষম হৈছে মুকলি সভাত অংশগ্ৰহণ কৰা দৰ্শক সকলক।

কাৰ্বি আংলং ডিফুৰ বাসিন্দা পিতৃ দেৱজিত মিশ্ৰ আৰু মাতৃ অন্তৰীফা মিশ্ৰৰ কন্যা আকাংক্ষা কাশ্যপে এলেঙ্গী মদাৰগুৰি সত্ৰৰ চলাজনা সত্ৰীয়া ‘জীৱন চন্দ্ৰ মহন্ত স্মাৰক বঁটা’ অসম সত্ৰ মহাসভাৰ পৰীক্ষা পৰিষদৰ অন্তৰ্গত ডিফু কলা কেন্দ্ৰ , ডিফু পৰীক্ষা কেন্দ্ৰ পৰা ২০১৬-১৭ বৰ্ষত সত্ৰীয়া নৃত্যৰ পাৰদৰ্শিতাৰ বিজয়ী বঁটা মুকলি সভাত গ্ৰহণ কৰে । বঁটাত আছিল নগদ পাঁচ হেজাৰ ধন , মান পত্ৰ আৰু মমেন্থ।

অসম সত্ৰ মহাসভাৰ সভাপতি জীতেন্দ্ৰ নাথ প্ৰধানিৰ সভাপতিত্বত অনুষ্ঠিত হয় মুকলি সভা। ৰাজ্যৰ প্ৰাক্তন পৰিবহণ মন্ত্ৰী তথা ৩১ নং চিদলী সমষ্টিৰ বিধায়ক চন্দন ব্ৰহ্মই উদ্ধোধন কৰি দিয়া মুকলি সভাত অসমৰ সাংস্কৃতিক পৰিক্ৰমা মন্ত্ৰী নৱ কুমাৰ দলে মুখ্য অতিথি ৰূপে আমন্ত্ৰিত আছিল যদিও কিছু ব্যক্তিগত কাৰণত উপস্থিত থাকিব নোৱাৰিলে। তদুপৰি মুকলি সভাত ব্ৰহ্ম ধৰ্মৰ আচাৰ্য চৰণ নাৰ্জাৰী আৰু বিভিন্ন সত্ৰৰ সত্ৰাধিকাৰ সকল উপস্থিত থাকে।

অন্তিম দিনৰ কাৰ্য্যসূচী অনুসৰি পুৱা এটি বৰ্ণাঢ্য সাংস্কৃতিক শোভাযাত্ৰা উলিওৱা হয়। অসম সত্ৰ মহাসভাৰ সভাপতি জীতেন্দ্ৰ নাথ প্ৰধাণীয়ে উদ্ধোধন কৰা সাংস্কৃতিক শোভাযাত্ৰ কোকৰাঝাৰ ৰাস পথাৰৰ পৰা আৰম্ভ হৈ কোকৰাঝাৰ চহৰ পৰিভ্ৰমণ কৰে। সাংস্কৃতিক শোভাযাত্ৰাত বড়ো, নেপালী, মাড়োৱাৰী, গাৰো, ৰাভা আদি বিভিন্ন অসমীয়া জনগোষ্ঠীৰ লোকে নিজৰ নিজৰ সাংস্কৃতিক নৃত্য প্ৰদৰ্শন কৰি জীপাল কৰি তোলে কোকৰাঝাৰ চহৰ।