ম্যানমাৰৰ পৰা পলাই অহা ১৫ গৰাকী ৰোহিংগীয়াক বদৰপুৰত আটক,আছে মহিলা আৰু শিশুও

জুণ্টা প্ৰশাসনে উত্তপ্ত কৰি ৰখা ম্যানমাৰৰ পৰা পলাই অহা ১৫ গৰাকী ৰোহিংগীয়াক আজি বদৰপুৰত ৰে’ল আৰক্ষীয়ে আটক কৰে।

ৰে’ল আৰক্ষীৰ সূত্ৰই প্ৰকাশ কৰা মতে আজি দিনৰ ভাগত ৰোহিংগীয়া লোক কেইগৰাকীয়ে কৰিমগঞ্জ জিলাৰ বদৰপুৰ ৰে’ল ষ্টেছনৰ ১ নং প্লেটফৰ্মত বহি থকা অৱস্থাত তিনি জন আৰপিএফৰ জোৱানে তেওঁলোকক প্ৰত্যক্ষ কৰে আৰু সন্দেহবশতঃ তেওঁলোকক আটক কৰা হয়।

ৰে’ল আৰক্ষীৰ জেৰাৰ অন্তত তেওঁলোক ৰোহিংগীয়া বুলি নিশ্চিত কৰা হয়।আটক কৰা লোকসকলৰ ভিতৰত তিনিগৰাকী মহিলা আৰু ৬ টি শিশুও আছে।

আৰক্ষীৰ জেৰাত ৰোহিংগীয়া লোককেইজনে প্ৰকাশ কৰা মতে তেওঁলোকে উত্তৰপ্ৰদেশৰ আলিগড়ত বাস কৰি আছিল আৰু শেহতীয়াকৈ তেওঁলোকে শিলিগুড়িলৈ আহিছিল।

শিলিগুড়িৰ পৰা তেওঁলোকে শিয়ালদহ-শিলচৰ বিশেষ ৰে’লেৰে বৃহস্পতিবাৰে বদৰপুৰলৈ আহিছিল।

বদৰপুৰত তেওঁলোকে এখন হোটেলত আছিল।বদৰপুৰৰ পৰা আগৰতলালৈ যোৱাৰ উদ্দেশ্যে তেওঁলোকে ষ্টেছনলৈ আহিছিল বুলি জেৰাৰ সময়ত প্ৰকাশ কৰিছে।আৰপিএফে পিছত তেওঁলোকক জিআৰপিৰ হাতত গতাই দিয়ে।

ধৃত লোক কেইজনক কৌছাৰ,মহম্মদ আয়ুব,মহম্মদ ছায়েদ,মহম্মদ আনিছ,মহম্মদ ইছমাইল,মহম্মদ ৰফিক,ছুনা মেহেৰ,জয়নাব বেগম,ছুবেৰা , ৰাফিয়া,মুছলিম,দিলাৰা,নুৰ আজিদা, মহম্মদ ইছলাম আৰু নুৰ ফাটেমা বুলি চিনাক্ত কৰা হৈছে।