এন আৰ চিৰ স্পৰ্শকাতৰ তথ্য ৰাজহুৱা; চৰকাৰৰ বিৰুদ্ধে ন্যায়ালয়ৰ কাষ চাপিব দেৱব্ৰত শইকীয়া

ৰাষ্ট্ৰীয় নাগৰিক পঞ্জীৰ চূড়ান্ত তালিকা প্ৰকাশ নকৰা পৰ্য্যন্ত ইয়াৰ গুৰুত্বপূৰ্ণ তথ্য কাকো নিদিবলৈ উচ্চতম ন্যায়ালয়ৰ নিৰ্দেশ থকাৰ পিছতো খোদ ৰাজ্য চৰকাৰেই সেই তথ্য ৰাজহুৱা কৰি এই নিৰ্দেশ উলংঘা কৰিছে।

চৰকাৰৰ বিৰুদ্ধে এই অভিযোগ আনিছে বিৰোধী দলপতি তথা কংগ্ৰেছ বিধায়ক দেৱব্ৰত শইকীয়াই।

“ৰাষ্ট্ৰীয় নাগৰিক পঞ্জী উন্নীতকৰণৰ প্ৰক্ৰিয়াটো চলি থকাৰ মাজতে ৰাজ্য চৰকাৰে ন্যায়ালয়ৰ নিৰ্দেশনাক অৱমাননা কৰিছে”, ২ জুলাইত নতুন বিধায়ক আৱাসত এখন সংবাদমেল সম্বোধন কৰি শইকীয়াই কয়।

তেওঁ অসম চৰকাৰৰ বিৰুদ্ধে ন্যায়ালয়ৰ নিৰ্দেশনা অৱমাননাৰ অভিযোগ আনি উচ্চতম ন্যায়ালয়ৰ কাষ চপাৰ কথাও ঘোষণা কৰে।

“উচ্চতম ন্যায়ালয়ৰ এটা ৰায় আছিল যে, উচ্চতম ন্যায়ালয়ৰ অনুমতি অবিহনে ন্যায়পালিকা, বিধানমণ্ডল বা কাৰ্য্যপালিকাই প্ৰতীক হাজেলাই যিখিনি ছেনছিটিভ নথি-পত্ৰ বা কাগজ দিছে সেইখিনি কোনেও যাতে ব্যৱহাৰ নকৰে। আনকি কেন্দ্ৰীয় চৰকাৰৰ এটৰ্নি জেনেৰেলে উচ্চতম ন্যায়ালয়ত আৱেদন জনাইছিল যদিও আদালতে তেওঁলোকক সেইখিনি তথ্য দিয়াৰ পৰা বিৰত আছিল”, সংবাদমেলত শইকীয়াৰ দাবী।

উল্লেখযোগ্য যে, ১ জুলাইত বিধানসভাত অসম চৰকাৰৰ হৈ মন্ত্ৰী চন্দ্ৰমোহন পাটোৱাৰীয়ে এন আৰ চিৰ কিছুমান অতি স্পৰ্শকাতৰ তথ্য ৰাজহুৱা কৰিছিল।

“কোন জিলাত কিমান শতাংশ লোকে চূড়ান্ত খচৰাত নাম উঠাব পৰা নাই, সেই গোটেইখিনি তথ্য কালি বিধানসভাত দাঙি ধৰা হৈছিল, যিটো উচ্চতম ন্যায়ালয়ৰ উক্ত নিৰ্দেশনাৰ অৱমাননা”, বিৰোধী দলপতিজনে কয়।

শইকীয়াই লগতে কয়, “এই বিষয়ে উচ্চতম ন্যায়ালয়ক অৱগত কৰা হ’ব। অসম চৰকাৰে সৰ্বোচ্চ ন্যায়পালিকাৰ নিৰ্দেশকো অৱমাননা কৰিছে। গতিকে অসম চৰকাৰৰ বিৰুদ্ধে যেনে ধৰণৰ ব্যৱস্থা গ্ৰহণ কৰিব লাগে তেনেধৰণে ল’বলৈ আহ্বান জনাম”।

অৱশ্যে, কেতিয়া তেওঁ উচ্চতম ন্যায়ালয়ৰ কাষ চাপিব সেই কথা জনোৱাৰ পৰা বিৰত থাকে।

আনহাতে, উক্ত সংবাদমেলতে ‘শুদ্ধ এন আৰ চি সকলোৱে বিচাৰিছে’ বুলি উল্লেখ কৰি তেওঁ কয় “কিন্তু বিভিন্ন মহলে ইয়াত বিধি-পথালি দিবলৈ বিচাৰি আছে। উচ্চতম ন্যায়ালয়ে ইতিমধ্যে জনাইছে যে ২৭ শতাংশ এন আৰ চি পুনৰীক্ষণ হৈছে, যিটো ২০ শতাংশতকৈ ৭ শতাংশ বেছি, তেনেস্থলত যেতিয়া কাৰোবাৰ বিৰুদ্ধে অভিযোগ আহে বা কাৰোবাৰ নথি-পত্ৰ শুদ্ধ নহয়, তেতিয়াহে তেওঁৰ পুনৰীক্ষণৰ দৰকাৰ হয়।”

“যিহেতু ইতিমধ্যে ২৭ শতাংশৰ পুনৰীক্ষণ হৈ গ’ল, সেয়েহে ইয়াক আৰু অধিক বিলম্ব কৰি দীৰ্ঘদিনীয়া সমস্যাক ৰাজনীতি কৰিবলৈ কোনেও যাতে অযথা ব্যৱহাৰ নকৰে, তাৰ বাবেই বিৰোধী দলে সদনত বক্তব্য ৰাখিছো”, শইকীয়াৰ মন্তব্য।