তিনিমাহ ধৰি বিজুলি ভৱনৰ ষ্ট্ৰং ৰুমতে আৱদ্ধ এ পি ডি চি এল পৰীক্ষাৰ উত্তৰ বহী

অসম বিদ্যুৎ বিতৰণ কোম্পানি লিমিটেডৰ ১৯৫৭ টা বিভিন্ন পদৰ বাবে যোৱা ২৮ এপ্ৰিলত  অসমৰ ৬৪৩ কেন্দ্ৰত বিভিন্ন পদৰ বাবে অনুস্থিত হৈছিল পৰীক্ষা।

উল্লেখ্য যে, পৰীক্ষাটো বিদ্যুৎ বিভাগৰ তিনিটা কোম্পানী ক্ৰমে এ পি ডি চি এল, এ পি জি চি এল আৰু এ ই জি চি এলৰ বিভিন্ন পদৰ বাবে যোৱা ২৮ এপ্ৰিল ২০১৯ ত পৰীক্ষা অনুস্থিত হৈ গৈছিল।

ইয়াৰে সহকাৰী হিচাপ বিষয়াৰ ৬০ টা পদ, কাৰ্যালয় ক্ষেত্ৰ সহায়কৰ ১০০০ টা পদ, লঘু বাহন ড্ৰাইভাৰৰ ২৫ টা পদ আৰু সহায়কৰ ৮৭২ টা পদৰ বাবে অনুষ্ঠিত হৈছিল পৰীক্ষা।

প্ৰায় ২ লাখৰো অধিক পৰীক্ষাৰ্থীয়ে আবেদন কৰা পৰীক্ষাটো অনুস্হিত কৰিছিল ‘নেইকম ইম্পেৰেশ্যন’ নামৰ কোম্পানীয়ে।

কিন্তু তাৎপয্যপূৰ্ণ ভাৱে পৰীক্ষা অনুস্থিত হৈ যোৱাৰ ৩ মাহৰ পাছতো বিজুলি ভৱনতে আৱদ্ধ হৈ আছে পৰীক্ষাৰ উত্তৰ বহী।

এই সন্দৰ্ভত বিজুলী ভৱনৰ অ’ এছ ডি দীপাংকৰ দিহিংগীয়াই কয়, ‘চৰকাৰী নিৰ্দেশনাৰ বাবেই বৰ্তমানেও বহী সমূহ পৰীক্ষা কৰা হোৱা নাই। চৰকাৰৰ অধীনতে বৰ্তমান সময়ত সকলো উত্তৰ বহী কটকটীয়া নিৰাপত্তাৰ মাজত বিজুলী ভৱনৰ ষ্ট্ৰং ৰুমত আৱদ্ধ হৈ আছে। আমি চৰকাৰী নিৰ্দেশনা পালেই উত্তৰ বহী সমূহ পৰীক্ষাৰ কাম হাতত লম।‘

উল্লেখ্য যে, প্ৰাক্তন শক্তি মন্ত্ৰী তপন গগৈ লোকসভালৈ নিৰ্বাচিত হৈ যোৱাৰ পাছৰে পৰা শক্তি বিভাগ মুখ্য মন্ত্ৰীৰ অধীনত আছে।

ৰাজ‍্যৰ বহু হাজাৰ হাজাৰ পৰীক্ষাৰ্থী অৱতীৰ্ণ হোৱা পৰীক্ষাটোৰ উত্তৰ বহী এতিয়ালৈকে বিজুলী ভৱনৰ ষ্ট্ৰং ৰুমৰ ভিতৰতে আৱদ্ধ হৈ থকা বিষয়টোৱে চিন্তিত কৰি তুলিছে পৰীক্ষাৰ্থী সকলক।

ইফালে এই সন্দৰ্ভত বহুকেইগৰাকী পৰীক্ষাৰ্থীয়ে নৰ্থ-ইষ্ট নাওক জানিব দি কয়, ‘বহু কষ্টেৰে এটা পৰীক্ষাৰ বাবে প্ৰস্তুতি কৰাৰ পাছত যেতিয়া তাৰ ফলাফলৰ বাবে মাহৰ পিছত মাহ অপেক্ষা কৰিব লগীয়া হয়, ই অতি কষ্টকৰ। ফলাফল লাগিলে যিয়ে নহওক আমাৰ বাবে ৰিজাল্টতো সোনকালে পালে ভাল লাগে।‘

এতিয়া প্ৰশ্ন হ’য়, এই উত্তৰ বহী সমূহ কেতিয়া পৰীক্ষা কৰা হ’ব। তদুপৰি কিয় ইমান দিনে উত্তৰ বহী সমূহ এনেদৰে ৰাখি থৈছে সেয়া এক ৰহস্যৰ বিষয়।

ইয়াৰ উপৰি আৰু কিমান দিন ফলাফললৈ অপেক্ষা কৰিব লাগিব সেই বিষয়েও চৰকাৰৰ পৰা উত্তৰ বিচাৰিছে পৰীক্ষাৰ্থী সকলে।