ডাঙৰ খবৰ! ভৰত নৰহ-ৰাণী নৰহে বিজেপিত যোগদান নকৰে, স্পষ্ট কৰিলে ৰাণী নৰহে

কংগ্ৰেছৰ দুই নেতা-নেত্ৰী ভৰত নৰহ আৰু তেওঁৰ সাংসদ পত্নী ৰাণী নৰহে অচিৰেই বিজেপিত যোগদান কৰিব বুলি ওলাই থকা সকলো বাতৰিৰ সত্যতা নস্যাৎ কৰিছে সাংসদ ৰাণী নৰহে।

বিজেপিৰ মজিয়াত ৰাজনৈতিক আশ্ৰয় বিচাৰি কংগ্ৰেছ নেতাই অভূতপূৰ্ব হেতা-ওপৰা লগাই থকাৰ সময়তে নৰ্থ-ইষ্ট নাওৰ আগত ইয়াক “ভিত্তিহীন” বুলি মন্তব্য দিয়ে সাংসদগৰাকীয়ে।

“মই বিজেপিত যোগদান কৰাটো সপোনতো দেখা নাই। দিঠকত দেখাৰো প্ৰশ্নই অহা নাই”, টেলিফোনত ৰাণী নৰহে কয়।

তেওঁক চাৰিওফালে প্ৰচাৰিত হৈ থকা বাতৰিৰ কথা মনত পেলাই দিয়াত কয়, “আচলতে এনে ধৰণৰ অবান্তৰ প্ৰশ্নৰ সন্মুখীন হ’বলৈয়ে ভাল নাপাওঁ। এই প্ৰশ্নটোৱেই অবান্তৰ”, নৰহৰ মন্তব্য।

অলপতে গুৱাহাটীলৈ অহাৰ ইংগিত দি সাংসদগৰাকীয়ে কয়, “মই গুৱাহাটীলৈ আহিলে আপোনালোকক লগ পাম”।

উল্লেখযোগ্য যে, প্ৰথম অৱস্থাত অগপত ৰাজনৈতিক কেৰিয়াৰ আৰম্ভ কৰা ভৰত নৰহে অগপৰ দুৰ্দিন অহাত কংগ্ৰেছত যোগদান কৰিছিল। তেওঁৰ পত্নী ৰাণী নৰহ বৰ্তমান কংগ্ৰেছৰ পৰা অসমক ৰাজ্যসভাত প্ৰতিনিধিত্ব কৰি আছে। দুয়োজনৰে এটা সময়ত লখিমপুৰৰত যথেষ্ট গণভিত্তি আছিল যদিও বিগত একাধিক নিৰ্বাচনত দুয়ো শোচনীয়ভাৱে পৰাজিত হৈছে।