ওৰাং ৰাষ্ট্ৰীয় উদ্যানত মেগজিনসহ থ্ৰী নট থ্ৰী ৰাইফল উদ্ধাৰ

দৰং জিলাৰ ওৰাং ৰাষ্ট্ৰীয় উদ্যান তথা ব্যাঘ্ৰ সংৰক্ষিত বনাঞ্চলৰ সুৰক্ষা বাহিনীৰ লোকে উদ্যানৰ সীমান্তৱৰ্তী ২নং কছাৰি ভেটিটপ গাঁৱৰ এটা পুখুৰীৰ পৰা বুধবাৰে মেগজিন সহিতে এটা পইণ্ট থ্ৰী নট থ্ৰী ৰাইফল উদ্ধাৰ কৰে।

উল্লেখ্য যে মঙলবাৰে নিশা গঁড় হত্যাৰ পৰিকল্পনা ৰচিছিল উক্ত গাঁওখনৰে জামালুদ্দিন আহমেদ নামৰ এজন কুখ্যাত চোৰাং চিকাৰীয়ে।

কিন্তু বন সুৰক্ষা বাহিনীৰ পহৰাৰ বাবে গঁড় হত্যাৰ পৰিকল্পনা বাতিল কৰিবলৈ বাধ্য হৈছিল জামালুদ্দিন। সুৰক্ষা কৰ্মীৰ হাতত ধৰা পৰাৰ ভয়ত নিজৰ ৰাইফলটো গাঁৱৰে এটা পুখুৰীত দলিয়াই দিয়ে আৰু সেই ঠাইৰ পৰা পলায়ন কৰে।

এই কথা গম পোৱাৰ পাছতে সুৰক্ষা কৰ্মীয়ে অভিযান চলাই পুখুৰীৰ পৰা ৰাইফলটো উদ্ধাৰ কৰিবলৈ সক্ষম হয়।

আনহাতে গঁড় চিকাৰত ব্যৰ্থ হৈ পলাই যাবলৈ সক্ষম হোৱা কুখ্যাত চোৰাং চিকাৰী জামালুদ্দিনৰ সন্ধান অব্যাহত আছে বুলি বন সুৰক্ষা বাহিনীৰ এটা শীৰ্ষ সূত্ৰই জানিবলৈ দিয়ে।