কলেজীয়া ছাত্ৰ-ছাত্ৰীৰ ওপৰত উদণ্ড যুৱকৰ মৰেল পুলিচগিৰি

হাইলাকান্দিত একাংশ উদণ্ড যুৱকে বৃহস্পতিবাৰে অৰ্থাৎ ২৯ আগষ্টত এহাল কলেজীয়া ছাত্ৰ-ছাত্ৰীৰ ওপৰত চলোৱা মৰেল পুলিচৰ ঘটনাই আজি হাইলাকান্দিত তীব্ৰ প্ৰতিক্ৰিয়াৰ সৃষ্টি কৰিছে।

উল্লেখযোগ্য যে বৃহস্পতিবাৰে হাইলাকান্দিৰ ৰবীন্দ্ৰ উদ্যানত কলেজ য়ুনিফৰ্ম পৰিহিত এহাল ছাত্ৰ-ছাত্ৰী অশালীন অৱস্থাত উদ্ধাৰ হৈছিল।

ইয়াৰ পিছতে একাংশ উদণ্ড প্ৰকৃতিৰ যুৱকে দুয়োগৰাকী ছাত্ৰ-ছাত্ৰীৰ ওপৰত মৰেল পুলিচ তথা অত্যাচাৰ চলাবলৈ আৰম্ভ কৰে। উদণ্ড যুৱকৰ দলটোৱে ছাত্ৰজনৰ কাপোৰ খুলিও প্ৰহাৰ কৰে।

পিছত এই সমগ্ৰ ঘটনাৰ ভিডিঅ’ একাংশই ছচিয়েল মিডিয়াত প্ৰচাৰ কৰিছিল। আৰু ইয়াৰ পিছতেই হাইলাকান্দিৰ সচেতন লোকৰ মাজত সৃষ্টি হৈছে তীব্ৰ প্ৰতিক্ৰিয়াৰ।

আনহাতে হাইলাকান্দিৰ স্থানীয় সচেতন ৰাইজৰ লগতে বিভিন্ন দল-সংগঠনে আৰক্ষীক এই সমগ্ৰ ঘটনাৰ লগত জড়িত উদণ্ড যুৱকৰ দলটোক শীঘ্ৰে আটক কৰি উচিত শাস্তি প্ৰদান কৰাৰ বাবে আহ্বান জনাইছে।