আগন্তুক ঘৰুৱা ছিজনত কৰ্ণাটকৰ বিপৰীতে নাগালেণ্ডৰ হৈ খেলিব ষ্টুৱাৰ্ট বিন্নীয়ে

আগন্তুক ঘৰুৱা ছিজনত ভাৰতীয় ক্ৰিকেট দলৰ অল ৰাউণ্ডাৰ ষ্টুৱাৰ্ট বিন্নীয়ে নাগালেণ্ডৰ হৈ খেলাৰ সিদ্ধান্ত গ্ৰহণ কৰিছে।

বিগত কেইবা মাহ ধৰি ভাৰতীয় ক্ৰিকেট দলৰ পৰা ফৰ্মজনিত কাৰণত ভাৰতীয় দলৰ পৰা বাহিৰ হৈ আছে বিন্নী।

ইতিমধ্যে এই ক্ষেত্ৰত অল ৰাউণ্ডাৰ গৰাকীয়ে নিজ ৰাজ্য কৰ্ণাটক ক্ৰিকেট ব’ৰ্ডৰ পৰা সংগ্ৰহ কৰিছে আপত্তিবিহীন প্ৰমাণপত্ৰ।

জানিব পৰা অনুসৰি ষ্টুৱাৰ্ট বিন্নীৰ উপৰি নাগালেণ্ড ক্ৰিকেট ব’ৰ্ডে যোগেশ টাকেৱালা আৰু শ্ৰীকান্ত মুন্ধেৰ ওপৰতো দৃষ্টি নিবদ্ধ ৰাখিছে।

এই মূহুৰ্তত ভাৰতীয় ক্ৰিকেটৰ আটাইতকৈ কম অভিজ্ঞতা সম্পন্ন দলটোৱে হৈছে নাগালেণ্ড।

উত্তৰ-পূবৰ আন পাঁচটা দলৰ সৈতে নাগালেণ্ডে যোৱা বছৰ ঘৰুৱা ক্ৰিকেটত খোজ পেলাইছিল।

প্ৰথমটো ছিজনত দলটোৱে ভাল প্ৰদৰ্শন আগবঢ়োৱাত বিফল হৈছিল যদিও ষ্টুৱাৰ্ট বিন্নী আৰু আন দুগৰাকীৰ অন্তৰ্ভুক্তিয়ে এইবাৰ দলটোৰ প্ৰদৰ্শনত যথেষ্ট পৰিমানে প্ৰভাৱ পৰিব বুলি ব’ৰ্ডে উল্লেখ কৰে।

জানিব পৰা মতে অহা ১০ ছেপ্তেম্বৰৰ ভিতৰত বিন্নীয়ে নাগালেণ্ড দলৰ প্ৰস্তুতি শিবিৰত যোগ দিব। ডিমাপুৰৰ ছভিমা ক্ৰিকেট গ্ৰাউণ্ডত চলিব প্ৰস্তুতি শিবিৰ।

উল্লেখ্য যে বিন্নীয়ে ভাৰতীয় দলৰ হৈ ৬খন টেষ্ট, ১৪খন এদিনীয়া আৰু ৩খন টি-২০ মেচত অংশ লৈছে।