ডিব্ৰুগড় বিশ্ববিদ্যালয়ৰ জয়মতী ছাত্ৰী নিবাসত ইংৰাজী বিভাগৰ মেধাৱী ছাত্ৰীৰ আত্মহত্যাক কেন্দ্ৰ কৰি চাঞ্চল্য

ডিব্ৰুগড় বিশ্ববিদ্যালয়ৰ ইংৰাজী বিভাগৰ ৰিংকি দত্ত নামৰ এগৰাকী মেধাৱী ছাত্ৰীয়ে মঙলবাৰে বিশ্ববিদ্যালয় চৌহদৰ ছাত্ৰী নিবাসৰ নিজৰ কোঠাত আত্মহত্যা কৰা ঘটনাক লৈ এতিয়া সমগ্ৰ ডিব্ৰুগড় বিশ্ববিদ্যালয় চৌহদত তীব্ৰ চাঞ্চল্যৰ সৃষ্টি হৈছে।

জানিব পৰা মতে, মঙলবাৰে ৰাতিপুৱাৰ পৰা ছাত্ৰীগৰাকীয়ে কোঠাৰ দুৱাৰ খোলা নাছিল আৰু ঘৰৰ পৰা অহা ফোনকলো ৰিচিভ কৰা নাছিল।

ছাত্ৰীগৰাকীয়ে বহু সময়লৈ নিজৰ কোঠাৰ দুৱাৰ নোখোলাত ছাত্ৰী নিবাসখনৰ দায়িত্বত থকা ৱাৰ্ডেন গৰাকীয়ে সন্দেহ বশত ছাত্ৰীগৰাকীৰ কোঠালৈ যায় আৰু কোঠাটো ভিতৰৰ পৰা বন্ধ হৈ থকাৰ বাবে ছাত্ৰীগৰাকীক মাতে যদিও কোনো ধৰণৰ উত্তৰ নহাত খিৰিকিৰে জুমি চাওতে ছাত্ৰীগৰাকীয়ে চিপ লৈ ওলমি থকা প্ৰত্যক্ষ কৰে।

আত্মহত্যা কৰা ৰিংকি দত্তৰ ঘৰ যোৰহাটত জিলাত। ডিব্ৰুগড় বিশ্ববিদ্যালয়ৰ ইংৰাজী বিভাগৰ তৃতীয় ষাণ্মাষিকৰ ছাত্ৰী আছিল ৰিংকি আৰু জয়মতী ছাত্ৰী নিবাসৰ আবাসী হিচাপে বিশ্ববিদ্যালয়খনত বিগত ডেৰ বছৰ ধৰি অধ্যয়ণ কৰি আছিল।

মেধাৱী ছাত্ৰীগৰাকীৰ আত্মহত্যাত হতভম্ব হৈ পৰিছে ছাত্ৰী নিবাসখনৰ আন ছাত্ৰীসকল। এতিয়ালৈ আত্মহত্যাৰ প্ৰকৃত কাৰণ জানিব পৰা হোৱা নাই যদিও ছাত্ৰীগৰাকীৰ সৈতে এখন চুইচাইড নোট উদ্ধাৰ কৰা হৈছে।

ঘটনাস্থলীত আৰক্ষীৰ দল উপস্থিত হৈ ছাত্ৰীগৰাকীৰ মৃতদেহটো উদ্ধাৰ কৰি মৰণোত্তৰ পৰীক্ষাৰ বাবে চিকিৎসালয়লৈ প্ৰেৰণ কৰিছে।