অন্য এক অভিলেখৰ বাবে সাজু সন্তৰণবিদ এলভিছ আলী হাজৰিকা

অলপতে মাৰ্কিন যুক্তৰাষ্ট্ৰৰ কেটেলিনা চেনেল সাঁতুৰি অভিলেখ গঢ়া অসম সন্তান এলভিছ আলী হাজৰিকাই আগবাঢ়িছে অন্য এক অভিলেখৰ বাবে।

২০২০চনৰ জুলাই মাহৰ তৃতীয় সপ্তাহত আয়াৰলেণ্ডৰ ৪২কিঃমিঃ দীঘল ‘ইৰিছ নৰ্থ চেনেল’ পাৰ কৰাৰ পৰিকল্পনা সন্তৰণবিদ গৰাকীৰ। শনিবাৰে গুৱাহাটী প্ৰেছ ক্লাৱত এক সংবাদ মেলত এই কথা উল্লেখ কৰে সন্তৰণবিদ এলভিছ আলী হাজৰিকাই।

অসমৰ এশিঙীয়া গঁড় ৰক্ষা কৰাৰ বাণীৰে আৰম্ভ কৰিব লগা তেওঁৰ এই যাত্ৰাত সহযোগ কৰিব পূৰ্বে একেলগে কেটেলিনা চেনেল পাৰ কৰা পশ্চিম বংগৰ সন্তৰণবিদ ৰিম’ চাহাই।

“ইৰিছ নৰ্থ চেনেল”ৰ কথা বাখ্যা কৰি তেওঁ কয়, ‘কেটেলিনা চেনেলতকৈ এই যাত্ৰা হ’ব কঠিন। প্ৰতি মুহূৰ্ততে পোৱা যাব সাগৰীয় ছাৰ্ক আৰু বিষাক্ত সাগৰীয় প্ৰাণী।‘

‘উষ্ণতা ১০ ডিগ্ৰী চেলচিয়াছতকৈ কম হোৱা এই চেনেলটোত সাঁতুৰিবৰ বাবে ৭ ৰ পৰা ১০ কেজি ওজন বঢ়াব লাগিব। ঠাণ্ডা অত্যধিক হোৱাৰ বাবেই এয়া কৰিব লাগিব।’ বুলি সন্তৰণবিগ গৰাকীয়ে সংবাদমাধ্যমত উল্লেখ কৰে।

আনহাতে আজিৰ সংবাদমেলতে এলভিছে দুখ প্ৰকাশ কৰি কয় যে, ‘অসম চৰকাৰে বৰ্তমান পৰ্যন্ত কেটেলিনা চেনেল সাঁতুৰি অভিলেখ গঢ়াৰ পাছত সম্বৰ্ধনাটো বাদেই বৰ্তমানলৈকে এটা শুভেচ্ছা বাৰ্তাও নজনালে।’

কেটেলিনা চেনেল সাঁতুৰি অভিলেখ গঢ়ি অসমলৈ অহাৰ সময়ত ৰে’ল ষ্টেশ্যনৰ পৰা তেওঁৰ পৰিয়ালৰ বাদে কোনো লোক নহাক লৈয়ো এলভিছ আলী হাজৰিকাই দুখ প্ৰকাশ কৰে।

বিপৰীতে ‘তেওঁৰ সহযোগী পশ্চিম বংগৰ সন্তৰণবিদ ৰিম’ চাহাক আদৰিবলৈ ৰাজ্যখনৰ ক্ৰীড়া মন্ত্ৰী ৰেল ষ্টেশ্যনত আহি উপস্হিত হৈছিল। কিন্তু হাজৰিকাক আদৰিবলৈ কোনো মন্ত্ৰী, বিধায়ক বাদেই সংবাদমাধ্যমৰো কোনো লোক উপস্হিত নহ’ল।’ বুলি তেওঁ উল্লেখ কৰে।

ইতিমধ্যে তাত যোৱাৰ বাবে হাজৰিকাই ছেপ্তেম্বৰৰ পৰাই প্ৰস্তুতি আৰম্ভ কৰাৰ কথা জানিবলৈ দিয়ে। লগতে তেওঁলোকৰ স্পনচৰস্বিপৰ বাবে চৰকাৰক সংবাদমেলৰ পৰাই অনুৰোধ জনায়। হাজৰিকাই জানিবলৈ দিয়া অনুসৰি সমগ্ৰ অভিযানটোৰ বাবে তেওঁলোকক প্ৰায় ১০ ৰ পৰা ১২ লাখ টকা প্ৰয়োজন হ’ব।