নৱেম্বৰত গৃহীত কৰা হ’ব নাগৰিকত্ব সংশোধনী বিধেয়ক: হিমন্ত বিশ্ব শৰ্মা

নৱেম্বৰত নাগৰিকত্ব সংশোধনী বিধেয়ক,২০১৬’ গৃহীত কৰা হ’ব। সোমবাৰে শিলচৰত এই কথা সদৰী কৰে উত্তৰ-পূব গণতান্ত্ৰিক মৰ্চা (নেডা)ৰ আহ্বায়ক তথা অসমৰ বিত্ত মন্ত্ৰী হিমন্ত বিশ্ব শৰ্মাই।

‘’এইক্ষেত্ৰত যদি কোনে বাধা নাহে, তেতিয়াহ’লে নাগৰিকত্ব সংশোধনী বিধেয়কখন নৱেম্বৰত গৃহীত কৰা হ’ব,’’-শিলচৰৰ এখন সমাৱেশত ভাষণ দি শৰ্মাই কয়।

সোমবাৰে তেওঁ কেন্দ্ৰৰ বিজেপি নেতৃত্বই আৰম্ভ কৰা ৰাষ্ট্ৰীয় একতা অভিযানৰ অন্তৰ্গত জন জাগৰণ সমাৱেশত ভাগ ল’বলৈ কৰিমগঞ্জ আৰু শিলচৰলৈ গৈছিল।

‘’অনুচ্ছেদ ৩৭০ আৰু ৩৫(এ) প্ৰত্যাহাৰ আৰু মুছলমান মহিলা (বিবাহৰ অধিকাৰ সুৰক্ষা)বিধেয়ক,২০১৯ গৃহীত হোৱাৰ পাছত কোনোৱে বিজেপিয়ে নাগৰিকত্ব সংশোধনী বিধেয়ক গৃহীত কৰিব নে নাই সেই সম্পৰ্কে সন্দেহ ৰখা উচিত নহয়,’’-শৰ্মাই কয়।

‘’আমি অহা নৱেম্বৰৰ ভিতৰত বিধেয়কখন গৃহীত কৰাৰ সম্পূৰ্ণ সম্ভাৱনা আছে,’’-তেওঁ লগতে কয়।

‘’কিন্তু ইয়াৰ বাবে সকলো দলকে বিশেষকৈ উত্তৰ-পূবৰ দলসমূহক তেওঁলোকৰ সাংস্কৃতিক আৰু ভাষিক অধিকাৰ সুৰক্ষাৰ বাবে আস্থাত লোৱা হ’ব,’’-তেওঁ লগতে সদৰী কৰে।

‘’এইটো আমাৰ নিৰ্বাচনী ইস্তাহাৰত আছিল আৰু সাধাৰণ নিৰ্বাচনৰ পূৰ্বে বহুতে আমাক কৈছিল যে আমি আসনসমূহ লাভ কৰিবলৈ সক্ষম নহ’ম,’’-তেওঁ কয়।

‘’কিন্তু আপোনালোকে নিজেই দেখিব যে ব্ৰহ্মপুত্ৰ উপত্যকাৰ বিভিন্ন অংশৰ বহু স্থানত জনসাধাৰণে বিজেপিক ৯৯ শতাংশ ভোট দিছে,’’-নেডাৰ আহ্বায়কগৰাকীয়ে লগতে কয়।

শৰ্মাই লগতেকয় যে বিজেপি ২০১৪’ৰ ৩১ ডিচেম্বৰ পৰ্যন্ত চুবুৰীয়া দেশত ধৰ্মীয় উৎপীড়নৰ বলি হৈ অহা পৰিয়ালসমূহক আশ্ৰয়, সুৰক্ষা তথা নাগৰিকত্ব আগবঢ়োৱাৰ বাবে দায়বদ্ধ।